(https://truevisionnews.com/) ഉപയോക്താക്കള്‍ ഏറെ നാളായി കാത്തിരുന്ന സുപ്രധാന സുരക്ഷാ ഫീച്ചർ അവതരിപ്പിക്കാൻ ഒരുങ്ങി വാട്‌സ്‌ആപ്പ്.

ഇനി മുതല്‍ സ്വന്തം ഫോണ്‍ നമ്പർ പങ്കുവെക്കാതെ തന്നെ മറ്റുള്ളവരുമായി ചാറ്റ് ചെയ്യാൻ സാധിക്കുന്ന 'യൂസർനെയിം' (Username) സംവിധാനമാണ് വാട്‌സ്‌ആപ്പില്‍ വരുന്നത്. ടെലഗ്രാം, ഇൻസ്റ്റഗ്രാം തുടങ്ങിയ പ്ലാറ്റ്‌ഫോമുകളിലുള്ളതിന് സമാനമായാണ് ഈ ഫീച്ചർ പ്രവർത്തിക്കുക.

ഇതുവരെ വാട്‌സ്‌ആപ്പില്‍ ഒരാളുമായി ബന്ധപ്പെടാൻ ഫോണ്‍ നമ്പർ നിർബന്ധമായിരുന്നു. എന്നാല്‍ പുതിയ അപ്ഡേറ്റോടെ, യൂസർനെയിം വഴി ഒരാളെ കണ്ടെത്തി ചാറ്റ് ചെയ്യുമ്പോള്‍ അവരുടെ മൊബൈല്‍ നമ്പർ പരസ്യമാകില്ല. പകരം യൂസർനെയിം മാത്രമേ കാണാൻ സാധിക്കൂ.

നിർബന്ധമല്ല, ആവശ്യമുള്ളവർക്ക് മാത്രം!

വാട്‌സ്‌ആപ്പ് യൂസർനെയിം സംവിധാനം എല്ലാവർക്കും നിർബന്ധിതമല്ല. നിലവിലുള്ള രീതിയില്‍ ഫോണ്‍ നമ്പർ ഉപയോഗിച്ച്‌ തന്നെ മുന്നോട്ട് പോകാൻ ആഗ്രഹിക്കുന്നവർക്ക് അതിന് തടസ്സമുണ്ടാകില്ല. ബിസിനസ് ആവശ്യങ്ങള്‍ക്കായി അന്യരുമായി ഇടപഴകുന്നവർക്കും സ്വകാര്യത ആഗ്രഹിക്കുന്നവർക്കും ഇത് ഏറെ സഹായകരമാകും.

യൂസർനെയിം എങ്ങനെ സജ്ജമാക്കാം?

പുതിയ ഫീച്ചർ ലഭ്യമായാല്‍ താഴെ പറയുന്ന രീതിയില്‍ യൂസർനെയിം ക്രിയേറ്റ് ചെയ്യാം:

വാട്‌സ്‌ആപ്പിലെ സെറ്റിങ്സ് മെനുവില്‍ പ്രവേശിക്കുക (ആൻഡ്രോയിഡില്‍ മുകളിലെ ത്രീ-ഡോട്ട് ഐക്കണിലും, ഐഫോണില്‍ താഴെയുള്ള സെറ്റിംഗ്സ് ടാബിലും ഇത് ലഭിക്കും).പ്രൊഫൈല്‍ നെയിമില്‍ ടാപ്പ് ചെയ്ത് അക്കൗണ്ട് വിശദാംശങ്ങളിലേക്ക് കടക്കുക. അവിടെ കാണുന്ന യൂസർനെയിം എന്ന പുതിയ ഓപ്ഷനില്‍ ക്ലിക്ക് ചെയ്ത് ഇഷ്ടമുള്ള പേര് നല്‍കാം.

പേര് തിരഞ്ഞെടുക്കുമ്പോള്‍ ശ്രദ്ധിക്കേണ്ട കാര്യങ്ങള്‍:

യൂസർനെയിം 3 മുതല്‍ 35 വരെ അക്ഷരങ്ങള്‍ ഉള്ളതായിരിക്കണം. അതില്‍ കുറഞ്ഞത് ഒരു ഇംഗ്ലീഷ് അക്ഷരം നിർബന്ധമാണ്.

അക്ഷരങ്ങള്‍, അക്കങ്ങള്‍, അണ്ടർസ്കോർ (_), പിരീഡ് (.) എന്നിവ മാത്രമേ ഉപയോഗിക്കാനാകൂ.

'www' എന്ന് തുടങ്ങുന്ന പേരുകളും, .com, .org, .in തുടങ്ങിയ ഡൊമെയ്ൻ എക്സ്റ്റൻഷനുകളില്‍ അവസാനിക്കുന്ന പേരുകളും അനുവദിക്കില്ല.