ജൂണ്‍ 6-നാണ് ഏക ടെസ്റ്റ് മത്സരം തുടങ്ങുന്നത്‌. ഏകദിന പരമ്പര ജൂണ്‍ 13-നും ആരംഭിക്കും. രണ്ട് ഫോർമാറ്റുകളിലേക്കുമുള്ള ടീമിനെ ബിസിസിഐ ഇതിനകം തന്നെ പ്രഖ്യാപിച്ചിട്ടുണ്ട് (Image Credit Source: PTI). ഏകദിന ടീമില്‍ ഹാർദിക് പാണ്ഡ്യ, രോഹിത് ശർമ്മ എന്നിവരെ ഉള്‍പ്പെടുത്തിയിട്ടുണ്ട്. എന്നാല്‍ ഇവരെ പ്ലേയിങ് ഇലവനില്‍ ഉള്‍പ്പെടുത്തുന്നത്‌ ഫിറ്റ്‌നസ് ക്ലിയറൻസിന് വിധേയമായിരിക്കുമെന്ന് ബിസിസിഐ അറിയിച്ചിരുന്നു. ഹാർദിക്കിനോടും രോഹിതിനോടും സെന്റർ ഓഫ് എക്സലൻസില്‍ റിപ്പോർട്ട് ചെയ്യാൻ ബിസിസിഐ നിർദ്ദേശിച്ചു. ഹാർദിക് പാണ്ഡ്യ ബംഗളൂരുവിലെ ബിസിസിഐ സെന്റർ ഓഫ് എക്സലൻസില്‍ ഉടനെത്തുമെന്നാണ് റിപ്പോര്‍ട്ട്. ഹാര്‍ദ്ദിക്ക് ഒരാഴ്ചയോളം ബെംഗളൂരുവില്‍ തുടരും. അതിനു ശേഷം ടീം ക്യാമ്പില്‍ ചേരും. രോഹിത് ബെംഗളൂരുവില്‍ എത്തിയോയെന്ന് വ്യക്തമല്ല. രോഹിതിനെക്കുറിച്ച്‌ പുതിയ വിവരങ്ങള്‍ ലഭ്യമായിട്ടില്ല.
അതേസമയം, പേസർ ആഖിബ് നബി ദാറിനെ ടീം മാനേജ്മെന്റ് നെറ്റ്സില്‍ പന്തെറിയാൻ വിളിച്ചു. രഞ്ജി ട്രോഫിയില്‍ മികച്ച പ്രകടനം പുറത്തെടുത്ത താരമാണ്‌ ആഖിബ്. അഫ്ഗാനിസ്ഥാനെതിരായ ഏക ടെസ്റ്റിന് മുന്നോടിയായി ആഖിബിനൊപ്പം മറ്റ് ആറ് പേരെയും നെറ്റ്സ് പരിശീലനത്തിനായി വിളിച്ചിട്ടുണ്ട്. സീഷാൻ അൻസാരിയോടും നെറ്റ്സില്‍ പന്തെറിയാൻ ആവശ്യപ്പെട്ടിട്ടുണ്ട്. ആഖിബിനെ ഇന്ത്യന്‍ ടീമില്‍ ഉള്‍പ്പെടുത്താത്തതിനെതിരെ വിമര്‍ശനങ്ങള്‍ ഉയര്‍ന്നിരുന്നു. ആഖിബിനെ ഇതുവരെ 15 അംഗ പ്രധാന ടീമില്‍ ഉള്‍പ്പെടുത്തിയിട്ടില്ല. എന്നാല്‍ സ്റ്റാൻഡ്-ബൈ താരങ്ങളുടെ പട്ടികയില്‍ അദ്ദേഹം ഉണ്ട്. ഐപിഎല്‍ ഫൈനലില്‍ പങ്കെടുത്ത കളിക്കാരൊന്നും ആദ്യ ദിവസം പരിശീലനത്തിന് ഇറങ്ങാൻ സാധ്യതയില്ല. ക്യാപ്റ്റന്‍ ശുഭ്മാന്‍ ഗില്‍ ഉള്‍പ്പെടെയുള്ള താരങ്ങള്‍ ഐപിഎല്‍ ഫൈനല്‍ കളിച്ചവരാണ്.