കണ്ണൂർ: കണ്ണൂർ സെൻട്രല് ജയിലില് 'സാമ്പാർ കലാപം'. സാമ്പാർ കൂടുതല് നല്കിയില്ല എന്ന വൈരാഗ്യത്താല് തടവുകാരൻ സഹ തടവുകാരനെ കുത്തിപ്പരുക്കേല്പ്പിച്ചതായി റിപ്പോർട്ട്.
കഴിഞ്ഞ ദിവസം ഗുളിക ഭക്ഷണത്തിന് മുൻപ് നല്കണം എന്ന് ആവശ്യപ്പെട്ട് കണ്ണൂർ സബ് ജയിലില് ഒരു തടവുകാരൻ ജയില് ജീവനക്കാരനെ മർദിച്ചതിന് പിന്നാലെയാണ് വീണ്ടും കണ്ണൂരിലെ തന്നെ ജയിലില് നിന്ന് വീണ്ടുമൊരു അക്രമം കൂടി റിപ്പോർട്ട് ചെയ്യപ്പെട്ടിരിക്കുന്നത്. ഇപ്പോള് തടവുകാർ തമ്മില് ഉണ്ടായിരിക്കുന്ന അടിപിടി സാമ്പാറിനെ ചൊല്ലിയാണ്, ഈ 'സാമ്പാർ' സംഘർഷത്തില് കണ്ണൂർ സെൻട്രല് ജയിലിലെ അഞ്ചാം ബ്ലോക്കിലെ ശിക്ഷാതടവുകാരനായ അമ്പലവയല് പോത്തുകെട്ടിയിലെ രാമൻകുട്ടി (56) ക്കാണ് പരിക്കേറ്റത്.
അഞ്ചാം ബ്ലോക്കിലെ തടവുകാരനായ കിരണ്രാജ് ഷെട്ടിയാണ് രാമൻകുട്ടിയെ കുത്തിപ്പരിക്കേല്പ്പിച്ചത്. സംഭവ ദിവസം പ്രഭാതഭക്ഷണം വിളമ്പിയത് രാമൻകുട്ടിയാണ്. ഇഡ്ഡലിയുടെ കൂടെ കൂടുതല് സാമ്പാർ വേണമെന്ന് കിരണ്രാജ് രാമൻകുട്ടിയോട് ആവശ്യപ്പെട്ടു. എന്നാല് എല്ലാ തടവുകാർക്കും തുല്യമായ രീതിയില് മാത്രമേ കറി വിളമ്പാൻ പാടൂള്ളൂ എന്നാണ് നിർദേശമെന്ന് രാമൻകുട്ടി പറഞ്ഞു.
മറുപടി കേട്ട് പ്രകോപിതനായ കിരണ്രാജ് രാമൻകുട്ടിയെ പിടിച്ചുതള്ളുകയും സ്റ്റീല്ഗ്ലാസുകൊണ്ട് നെറ്റിയില് കുത്തി പരുക്കേല്പ്പിക്കുകയുമായിരുന്നു എന്നാണ് വിവരം. തലയ്ക്ക് മുറിവേറ്റ രാമൻകുട്ടിയെ പിന്നീട് ജില്ലാ ആശുപത്രിയില് എത്തിച്ച് ചികിത്സ നല്കി. കഴിഞ്ഞ ദിവസം ഇതേ സെൻട്രല് ജയിലില് തന്നെ രണ്ട് കാപ്പാ തടവുകാർ തമ്മില് ഏറ്റുമുട്ടി ഒരാള്ക്ക് കുത്തേറ്റ സംഭവവും റിപ്പോർട്ട് ചെയ്യപ്പെട്ടിരുന്നു.
കാപ്പ നിയമപ്രകാരം കണ്ണൂർ സെൻട്രല് ജയിലില് തടവില് കഴിയുന്ന കോട്ടയം സ്വദേശിയായ മനുവിനാണ് കഴിഞ്ഞ ദിവസം കാപ്പാ തടവുകാർ തമ്മിലുണ്ടായ അടിപിടിയില് കുത്തേറ്റത്. എറണാകുളം സ്വദേശിയായ അപ്പു എന്ന മറ്റൊരു കാപ്പ തടവുകാരനാണ് മനുവിനെ കുത്തിയത്. പരുക്കേറ്റ മനുവിനെ ഉടൻ തന്നെ കണ്ണൂർ ഗവണ്മെന്റ് മെഡിക്കല് കോളേജ് ആശുപത്രിയില് പ്രവേശിപ്പിച്ചു.
ഗുളിക മുൻകൂർ നല്കാത്തതിന് ജയില് ജീവനക്കാരന് മർദനം
കണ്ണൂരില് തന്നെ കഴിഞ്ഞ ദിവസം തടവുകാരനില് നിന്ന് ജയില് ജീവനക്കാരന് മർദ്ദനമേറ്റ സംഭവവും റിപ്പോർട്ട് ചെയ്തിരുന്നു. പീഡനക്കേസില് കണ്ണൂർ സ്പെഷ്യല് സബ് ജയിലില് റിമാൻഡില് കഴിയുന്ന സുഹൈല് എന്ന പ്രതിയാണ് അസിസ്റ്റന്റ് പ്രിസണ് ഓഫീസറെ മർദ്ദിച്ചത്, ഇതിന്റെ കാരണവും കേട്ടാല് വിചിത്രമാണ്.
ആഹാരത്തിന് ശേഷം കഴിക്കേണ്ട ഗുളിക, ആഹാരം കഴിക്കുന്നതിന് മുൻപായി നല്കണമെന്ന് സുഹൈല് ആവശ്യപ്പെട്ടു. പക്ഷേ ഇത് അനുവദിക്കാൻ കഴിയാത്തതിനാല് ഉദ്യോഗസ്ഥർ തയാറായില്ല. ഇതോടെയാണ് തർക്കം ആരംഭിച്ചത്. പ്രതിയും ജീവനക്കാരും തമ്മില് വാക്കേറ്റം ഉണ്ടാകുകയും തുടർന്ന് സുഹൈല് ഉദ്യോഗസ്ഥനെ മർദ്ദിക്കുകയുമായിരുന്നു. തുടർന്ന് സുഹൈലിനെതിരെ ടൗണ് പോലീസ് കേസ് രജിസ്റ്റർ ചെയ്തിട്ടുണ്ട്.
English Summary
A fight broke out between prisoners in Kannur Central Jail over sambar. Ramankutty (56) of Ambalavayal Pothuketty, a convict in the fifth block of Kannur Central Jail, was injured. Ramankutty was stabbed by Kiranraj Shetty, an inmate in the same block. Kiranraj demanded more sambar with his idli. However, the accused attacked him after Ramankutty said that the order was to serve curry equally to all the prisoners.