ഹയർ സെക്കൻഡറി രണ്ടാം വർഷ (Plus Two) പരീക്ഷാ ഫലം വന്നതിന് പിന്നാലെ പ്രതീക്ഷിച്ച മാർക്ക് ലഭിക്കാത്ത വിഷമത്തില് ധാരാളം കുട്ടികളുണ്ടാകും.
പരീക്ഷാ ഫലത്തില് എന്തെങ്കിലും തരത്തിലുള്ള അതൃപ്തിയോ മാർക്കില് സംശയമോ ഉള്ള വിദ്യാർത്ഥികള്ക്ക് പൊതുവിദ്യാഭ്യാസ വകുപ്പ് പുനർമൂല്യനിർണയം, സൂക്ഷ്മപരിശോധന, ഫോട്ടോകോപ്പി എന്നിവയ്ക്ക് അപേക്ഷിക്കാനുള്ള അവസരം വരും ദിവസങ്ങളില് ഒരുക്കിയിട്ടുണ്ട്. വിദ്യാർത്ഥികള്ക്കും രക്ഷിതാക്കള്ക്കുമായി ഈ അപേക്ഷാ പ്രക്രിയയുടെ വിശദമായ വിവരങ്ങള് നമുക്ക് പരിശോധിക്കാം. മാർച്ചില് നടന്ന രണ്ടാം വർഷ ഹയർസെക്കൻഡറി പരീക്ഷയുടെ ഫലം ഇക്കഴിഞ്ഞ 26ാം തീയതിയാണ് പ്രസിദ്ധീകരിച്ചത്.
ഉത്തരക്കടലാസുകളുടെ പുനർമൂല്യനിർണയം, സൂക്ഷ്മപരിശോധന, ഫോട്ടോകോപ്പി എന്നിവയ്ക്കുള്ള അപേക്ഷകള് ഫീസ് സഹിതം, വിദ്യാർത്ഥികള് സ്കൂളിലെ പ്രിൻസിപ്പാളിന് ജൂണ് മൂന്നിനകം സമർപ്പിക്കേണ്ടതാണ്. ഇരട്ട മൂല്യനിർണ്ണയം നടത്തിയ ഫിസിക്സ്, കെമിസ്ട്രി, കണക്ക് എന്നീ വിഷയങ്ങളുടെ ഉത്തരക്കടലാസുകളുടെ പുനർമൂല്യനിർണയമോ, സൂക്ഷ്മപരിശോധനയോ ഉണ്ടായിരിക്കുന്നതല്ല എന്ന കാര്യം വിദ്യാർത്ഥികള് പ്രത്യേകം ശ്രദ്ധിക്കണം. എന്നാല് മേല്പ്പറഞ്ഞ ഉത്തരക്കടലാസുകളുടെ ഫോട്ടോകോപ്പിക്ക് നിങ്ങള്ക്ക് അപേക്ഷിക്കാവുന്നതാണ്.
ലക്ഷദ്വീപിലുളള ഹയർ സെക്കണ്ടറി സ്കൂളുകളിലെ വിദ്യാർത്ഥികളുടെ അപേക്ഷാഫീസ്, ഡിമാൻ്റ് ഡ്രാഫ്റ്റ് (Drawn in favour of Joint Director, Examinations (Higher Secondary Wing), Directorate of General Education, Thiruvananthapuram) മുഖാന്തിരം അതാതു സ്കൂള് പ്രിൻസിപ്പാള്മാർ ജൂണ് മൂന്നനകം സമർപ്പിക്കേണ്ടതാണ്. എന്നാല് അണ്-എയ്ഡഡ് ഹയർ സെക്കണ്ടറി സ്കൂളുകളില് നിന്നും പുനർമൂല്യനിർണ്ണയം, ഫോട്ടോകോപ്പി, സൂക്ഷ്മപരിശോധന എന്നിവയ്ക്കായി അപേക്ഷിക്കുന്ന വിദ്യാർത്ഥികളുടെ ഫീസ് മേല്പ്പറഞ്ഞ തീയതിക്കുള്ളില് പ്രിൻസിപ്പാള്മാർ ട്രഷറികളില് ഒടുക്കേണ്ടതാണ്. റീഫണ്ടിന് അർഹരായ അണ്-എയ്ഡഡ് സ്കൂള് വിദ്യാർത്ഥികളുടെ അപേക്ഷ ചലാൻ, ബാങ്ക് പാസ്ബുക്ക് എന്നിവയുടെ പകർപ്പ് സഹിതം അതാത് പ്രിൻസിപ്പാള്മാർ മുഖേന ഹയർ സെക്കണ്ടറി ഡയറക്ടറേറ്റിലേയ്ക്ക് അയച്ചു നല്കേണ്ടതാണ്.
പ്ലസ് ടു സേ, ഇംപ്രൂവ്മെന്റ് പരീക്ഷ
പ്ലസ് ടു സേ, ഇംപ്രൂവ്മെന്റ് പരീക്ഷയ്ക്ക് വിദ്യാർത്ഥികള്ക്ക് അപേക്ഷിക്കാനുള്ള അവസരമുണ്ട്. ഡി പ്ലസ് ഗ്രേഡോ, അതിന് മുകളിലോ നേടാനാകാത്തവർ യോഗ്യത നേടാത്ത എല്ലാ വിഷയങ്ങള്ക്കും രജിസ്റ്റർ ചെയ്യാവുന്നതാണ്. എന്നാല് എല്ലാ വിഷയങ്ങള്ക്കും ഡി പ്ലസ് ഗ്രേഡോ, അതിന് മുകളിലോ നേടിയവർക്ക് ഏതെങ്കിലും ഒരു വിഷയത്തിന് മാത്രം ഗ്രേഡ് മെച്ചപ്പെടുത്താൻ ഇംപ്രൂവ്മെന്റ് പരീക്ഷയ്ക്ക് അപേക്ഷിക്കാൻ സാധിക്കൂ. ബയോളജി പരീക്ഷയ്ക്ക് രജിസ്റ്റർ ചെയ്യുന്നവർ ബോട്ടണിയും, സുവോളജിയും എഴുതേണ്ടതുണ്ട്.
മാർച്ചിലെ രണ്ടാം വർഷ ഹയർ സെക്കൻഡറി പരീക്ഷയ്ക്ക് രജിസ്റ്റർ ചെയ്യാത്തവർക്ക് ജൂണില് നടക്കുന്ന സേ, ഇംപ്രൂവ്മെന്റ് പരീക്ഷയ്ക്ക് രജിസ്റ്റർ ചെയ്യാനാകില്ല എന്ന കാര്യം വിദ്യാർത്ഥികള് ശ്രദ്ധിക്കണം. സേ പരീക്ഷയില് വിദ്യാർത്ഥിക്ക് ഇതുവരെ കിട്ടിയ സ്കോറുകളുടെ അടിസ്ഥാനത്തില് യോഗ്യത രേഖപ്പെടുത്തി ക്രോഡീകരിച്ച സർട്ടിഫിക്കറ്റാകും നല്കുക. പരീക്ഷാ കേന്ദ്രങ്ങളുടെയും, ക്ലബ് ചെയ്യപ്പെട്ട സ്കൂളുകളുടെയും ലിസ്റ്റ് https://hseportal.kerala.gov.in/ എന്ന വകുപ്പുതല പോർട്ടലില് ലഭിക്കും.
പരീക്ഷയ്ക്ക് രജിസ്റ്റർ ചെയ്ത സ്കൂളില് നിന്ന് തന്നെ അപേക്ഷാം വാങ്ങാവുന്നതാണ്. പൂരിപ്പിച്ച അപേക്ഷകള് ഫീസ് സഹിതം നിശ്ചിത സമയപരിധിക്കുള്ളില് സ്കൂള് പ്രിൻസിപ്പലിന് സമർപ്പിക്കേണ്ടത്. അപേക്ഷയില് പാസ്പോർട്ട് സൈസ് ഫോട്ടോ ഉണ്ടായിരിക്കണം. പ്രിൻസിപ്പല് അത് സാക്ഷ്യപ്പെടുത്തണം. സേ പരീക്ഷയും, ഇംപ്രൂവ്മെന്റ് പരീക്ഷയും ജൂണ് 29 മുതല് ജൂലൈ മൂന്ന് വരെ നടക്കും. വിജ്ഞാപനം എച്ച്എസ്ഇ പോർട്ടലില് ലഭ്യമാണ്. ഈ വിജ്ഞാപനം പൂർണമായും വായിക്കേണ്ടതാണ്.
English Summary:
Kerala, has officially opened the application window for Revaluation, Scrutiny, and Photocopy of answer sheets for the Second Year (Plus Two) March 2026 Higher Secondary Examinations. Before submitting the application form students must know these things.