സംസ്ഥാനതല ഉദ്ഘാടനം പട്ടം ഗവ. മോഡല്‍ ഗേള്‍സ് ഹയര്‍ സെക്കന്‍ഡറി സ്‌കൂളില്‍ മുഖ്യമന്ത്രി വി.ഡി. സതീശന്‍ നിര്‍വഹിക്കും. രാവിലെ ഒമ്പതിന് നടക്കുന്ന ചടങ്ങളില്‍ വിദ്യാഭ്യാസമന്ത്രി എന്‍. ഷംസുദ്ദീന്‍ അധ്യക്ഷനാകും. ആരോഗ്യ-ദേവസ്വം വകുപ്പ് മന്ത്രി കെ. മുരളീധരന്‍, ഗതാഗതമന്ത്രി സി.പി. ജോണ്‍ തുടങ്ങിയവരും പങ്കെടുക്കും. യുഡിഎഫ് സര്‍ക്കാര്‍ അധികാരമേറ്റതിനു ശേഷമുള്ള ആദ്യ പ്രവേശനോത്സവമാണിത്.

പ്രവൃത്തിദിനങ്ങള്‍

പുതിയ അധ്യയന വര്‍ഷത്തിലെ വിദ്യാഭ്യാസ കലണ്ടറും തയ്യാറാക്കിയിട്ടുണ്ട്. പുതിയ അധ്യയനവർഷത്തില്‍ ആകെ 197 ദിവസങ്ങളാണ് പൊതുവായ പ്രവൃത്തിദിനങ്ങള്‍. എല്‍പി വിഭാഗത്തില്‍ ആകെ 800 അധ്യയന മണിക്കൂറുകള്‍ ആവശ്യമുണ്ട്. എല്‍പി, ഹയർ സെക്കൻഡറി സ്കൂളുകളില്‍ ശനിയാഴ്ചകളില്‍ ക്ലാസുകള്‍ ഉണ്ടായിരിക്കുന്നതല്ല.

എല്‍പി സ്കൂളുകളിലും, നിലവില്‍ത്തന്നെ അധിക പഠനസമയമുള്ള ഹയർ സെക്കൻഡറി വിഭാഗത്തിലും ഈ 197 ദിവസങ്ങളിലായിരിക്കും അധ്യയനം നടക്കുക. ഹൈസ്കൂള്‍ വിഭാഗത്തില്‍ 7 ശനിയാഴ്ചകള്‍ അധികമായി ക്ലാസുകള്‍ ഉണ്ടായിരിക്കും. യുപി സ്‌കൂളുകളില്‍ മൂന്ന്‌ ശനിയാഴ്ചകള്‍ അധിക പ്രവൃത്തിദിനങ്ങളായിരിക്കും. എന്നാല്‍ ആഴ്ചയില്‍ ആറു ദിവസവും തുടർച്ചയായി ക്ലാസുകള്‍ വരുന്ന രീതിയിലല്ല ഇത് ക്രമീകരിച്ചിരിക്കുന്നത്.

യുപി വിഭാഗത്തില്‍ ആയിരം അധ്യയന മണിക്കൂറും, ഹൈസ്‌കൂളുകളില്‍ 1200 മണിക്കൂര്‍ പഠനസമയവും ഉറപ്പാക്കുന്നതിനായാണ് അധിക പ്രവൃത്തിദിനങ്ങള്‍ നിശ്ചയിച്ചിരിക്കുന്നത്. ശനിയാഴ്ചകളിലെ അധിക ദിവസങ്ങള്‍ ഉള്‍പ്പെടെ ആകെ 200 പ്രവൃത്തിദിനങ്ങള്‍ യുപി സ്കൂളുകള്‍ക്ക് ഉണ്ടായിരിക്കും. ആകെ 204 പ്രവൃത്തിദിനങ്ങളാണ് ഹൈസ്കൂളുകള്‍ക്കായി നിശ്ചയിച്ചിരിക്കുന്നത്.

എന്നാല്‍, പ്രാദേശികമായ അവധികള്‍ കാരണം നിശ്ചിത പ്രവൃത്തിദിനങ്ങള്‍ നഷ്ടമാവുകയാണെങ്കില്‍, അത് പരിഹരിക്കാനായി കൂടുതല്‍ ശനിയാഴ്ചകള്‍ പ്രവൃത്തിദിനങ്ങളായി മാറ്റും.

അധിക സമയക്രമം ഈ അധ്യയനവർഷത്തിലും ഹൈസ്കൂളുകളില്‍ തുടരുന്നതാണ്. കുട്ടികള്‍ക്ക് വർഷത്തില്‍ 1100 അധ്യയന മണിക്കൂറുകള്‍ ഉറപ്പാക്കുക എന്നതാണ് ലക്ഷ്യം. വെള്ളിയാഴ്ച ഒഴികെയുള്ള എല്ലാ പ്രവൃത്തിദിനങ്ങളിലും രാവിലെയും വൈകുന്നേരവും 15 മിനിറ്റ് വീതം അധികമായി പഠനസമയം ഉണ്ടായിരിക്കും. ഇതുപ്രകാരം രാവിലെ 9.45 മുതല്‍ വൈകിട്ട് 4.15 വരെയാകും ക്ലാസ്.

ഔദ്യോഗിക പ്രവേശനോത്സവ ഗാനം

സൈബർ സുരക്ഷാ പ്രതിജ്ഞ

പ്രവേശനോത്സവത്തില്‍ നീണ്ട പ്രസംഗങ്ങള്‍ ഒഴിവാക്കും. പകരം വിദ്യാര്‍ത്ഥികളുമായി സംവദിക്കുന്ന പരിപാടികള്‍ സംഘടിപ്പിക്കാനാണ് സര്‍ക്കാര്‍ നിര്‍ദ്ദേശം നല്‍കിയിരിക്കുന്നത്. കുട്ടികള്‍ക്ക്‌ സൈബർ സുരക്ഷയെക്കുറിച്ച്‌ ബോധവല്‍ക്കരണം നല്‍കാൻ കേരള പോലീസ് സൈബർ ഡോം വിഭാവനം ചെയ്ത 'കിഡ് ഗ്ലൗ' പദ്ധതിയുടെ ഭാഗമായി വിദ്യാർത്ഥികള്‍ പ്രത്യേക സൈബർ സുരക്ഷാ പ്രതിജ്ഞ ചൊല്ലും. വര്‍ധിച്ചുവരുന്ന ഓണ്‍ലൈന്‍ ചതിക്കുഴികള്‍, സുരക്ഷിതമല്ലാത്ത ഡിജിറ്റല്‍ ഇടപാടുകള്‍ തുടങ്ങിയവയെക്കുറിച്ച്‌ വിദ്യാര്‍ത്ഥികള്‍ അവബോധം ശക്തമാക്കുകയാണ് ലക്ഷ്യം.

സംസ്ഥാനത്തെ സ്കൂളുകളിലേക്കുള്ള പാഠപുസ്തകങ്ങളുടെ വിതരണം ഉടന്‍ പൂര്‍ത്തിയാക്കാനാണ് നീക്കം. 90 ശതമാനത്തിലേറെ പുസ്തകവിതരണം ഇതിനകം പൂര്‍ത്തിയായി. ഗ്രീന്‍ പ്രോട്ടോക്കോള്‍ പാലിച്ചാകും പ്രവേശനോത്സവം സംഘടിപ്പിക്കുക.

English Summary

Kerala's new school year features extra working Saturdays for UP and High School sections to complete lessons. High school classes will run from 9:45 AM to 4:15 PM to ensure 1,100 instructional hours. Students will take a cyber security pledge during their school reopening ceremony tomorrow. Textbook distribution is almost complete, though some CBSE schools will reopen later this week.