കുന്നമംഗലം കുരുക്കത്തൂരില്‍ ഇന്നലെ ഉച്ചയോടെയാണ് നാടിനെ നടുക്കിയ അപകടം സംഭവിച്ചത്. നിർമ്മാണശാല പ്രവർത്തിച്ചിരുന്ന വീടിന്റെ ഉടമസ്ഥനും അദ്ദേഹത്തിന്റെ ബന്ധുവുമാണ് മരിച്ചതെന്നാണ് പ്രാഥമിക വിവരം.

കുരുക്കത്തൂരില്‍ വാടകയ്ക്ക് എടുത്ത ഒരു വീട് കേന്ദ്രീകരിച്ചായിരുന്നു പടക്ക നിർമ്മാണം നടന്നിരുന്നത്. വിഷു വിപണി ലക്ഷ്യമിട്ട് വൻതോതില്‍ പടക്കങ്ങള്‍ ഇവിടെ നിർമ്മിച്ചു വരികയായിരുന്നു. നിർമ്മാണത്തിനിടെ മരുന്നിന് തീപിടിച്ചതാണ് പൊട്ടിത്തെറിക്ക് കാരണമായതെന്ന് സംശയിക്കുന്നു. സ്ഫോടനത്തിന്റെ ആഘാതത്തില്‍ വീട് പൂർണ്ണമായും തകരുകയും സമീപത്തെ വീടുകള്‍ക്ക് കേടുപാടുകള്‍ സംഭവിക്കുകയും ചെയ്തു.

ശബ്ദം കേട്ട് ഓടിയെത്തിയ നാട്ടുകാരാണ് ആദ്യം രക്ഷാപ്രവർത്തനം നടത്തിയത്. ഉടൻ തന്നെ അഗ്നിശമന സേനയും പോലീസും സ്ഥലത്തെത്തി. പരിക്കേറ്റ ആറുപേരെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിച്ചു. ഇതില്‍ രണ്ടുപേരുടെ നില അതീവ ഗുരുതരമാണെന്നാണ് റിപ്പോർട്ടുകള്‍.

യാതൊരുവിധ സുരക്ഷാ മാനദണ്ഡങ്ങളും പാലിക്കാതെ പ്രവർത്തിച്ചിരുന്ന അനധികൃത പടക്ക നിർമ്മാണ കേന്ദ്രമാണിതെന്ന് പോലീസ് സ്ഥിരീകരിച്ചു. ജനവാസ മേഖലയില്‍ ഇത്തരത്തില്‍ സ്ഫോടകവസ്തുക്കള്‍ കൈകാര്യം ചെയ്തതിനെക്കുറിച്ച്‌ പോലീസ് അന്വേഷണം ആരംഭിച്ചിട്ടുണ്ട്. സംഭവസ്ഥലത്ത് ഫോറൻസിക് വിദഗ്ധരും ഡോഗ് സ്ക്വാഡും പരിശോധന നടത്തി വരികയാണ്. വരും ദിവസങ്ങളില്‍ ജില്ലയിലെ സമാനമായ കേന്ദ്രങ്ങളില്‍ പരിശോധന ശക്തമാക്കുമെന്ന് അധികൃതർ അറിയിച്ചു.