കുട്ടികളെ സ്കൂളില്‍ വിടുന്നതിനൊപ്പം ഓഫീസില്‍ പോകുന്നവർക്കായുള്ള ഭക്ഷണവും കൂടി രാവിലെ തന്നെ തയ്യാറാക്കേണ്ടി വരുന്നത് വീട്ടമ്മമാർക്കും ജോലിക്ക് പോകുന്നവർക്കും വലിയൊരു വെല്ലുവിളിയാണ്. എന്നാല്‍, ആഴ്ചയിലൊരിക്കല്‍ കുറച്ചു സമയം മാറ്റിവെച്ചാല്‍ അടുത്ത ഒരാഴ്ചക്കാലം അടുക്കളയിലെ ടെൻഷൻ പൂർണ്ണമായും ഒഴിവാക്കാം. ഇതിനായി അന്താരാഷ്ട്ര തലത്തില്‍ തരംഗമായ മീല്‍ പ്രെപ്പ് രീതി പരീക്ഷിക്കാവുന്നതാണ്.

എന്താണ് മീല്‍ പ്രെപ്പ്?

ഒരു ദിവസത്തെ അവധി സമയം പ്രയോജനപ്പെടുത്തി അടുത്ത 3 മുതല്‍ 4 വരെയോ അല്ലെങ്കില്‍ ഒരാഴ്ചത്തേക്കോ ഉള്ള വിഭവങ്ങള്‍ മുൻകൂട്ടി ആസൂത്രണം ചെയ്ത്, പകുതിയോ പൂർണ്ണമായോ തയ്യാറാക്കി വെക്കുന്ന രീതിയാണിത്. ഇത് സമയവും പണവും ലാഭിക്കാൻ സഹായിക്കുമെന്ന് മാത്രമല്ല, ദിവസേനയുള്ള മാനസിക സമ്മർദ്ദം ഗണ്യമായി കുറയ്ക്കുകയും ചെയ്യും.

മീല്‍ പ്രെപ്പ് ചെയ്യുന്നതിലൂടെയുള്ള ഗുണങ്ങള്‍

• പ്രവൃത്തിദിവസങ്ങളില്‍ രാവിലെ എന്ത് പാചകം ചെയ്യണമെന്ന ചിന്ത ഒഴിവാക്കാം.
• മെനു മുൻകൂട്ടി പ്ലാൻ ചെയ്യുന്നതിനാല്‍ പോഷകസമൃദ്ധമായ വിഭവങ്ങള്‍ തിരഞ്ഞെടുക്കാനാകും. ഇത് ഹോട്ടല്‍ ഭക്ഷണത്തെയും ജങ്ക് ഫുഡുകളെയും ഒഴിവാക്കാൻ സഹായിക്കും.
• ഭക്ഷണത്തിന്റെ അളവ് മുൻകൂട്ടി നിശ്ചയിക്കുന്നതിനാല്‍ അമിതമായി ഭക്ഷണം കഴിക്കുന്നത് തടയാം.
• ഷോപ്പിംഗ് ലിസ്റ്റ് കൃത്യമായി തയ്യാറാക്കി സാധനങ്ങള്‍ വാങ്ങുന്നതിനാല്‍ ആവശ്യമില്ലാത്തവ വാങ്ങി പണം കളയുന്നത് ഒഴിവാക്കാം; ഭക്ഷണസാധനങ്ങള്‍ പാഴാകുകയുമില്ല.

മീല്‍ പ്രെപ്പ് ചെയ്യേണ്ട പ്രധാന രീതികള്‍

ബാച്ച്‌ കുക്കിങ്

• വലിയ അളവില്‍ ഭക്ഷണം ഒരുമിച്ച്‌ തയ്യാറാക്കി ഫ്രിഡ്ജിലോ ഫ്രീസറിലോ സൂക്ഷിക്കുന്ന രീതിയാണിത്.
• കാരറ്റ്, ബീൻസ്, കാബേജ് തുടങ്ങിയ പച്ചക്കറികള്‍ മസാലകള്‍ ചേർത്ത് വേവിച്ച്‌ വെക്കാം.
• ഇഡ്‌ലി, ദോശ മാവ് എന്നിവ ആഴ്ചയിലേക്ക് ആവശ്യമുള്ളത് തയ്യാറാക്കി വെക്കുക.
• ചിക്കൻ, ബീഫ് എന്നിവ ഡ്രൈ റോസ്റ്റ് രൂപത്തിലാക്കി ഫ്രിഡ്ജില്‍ സൂക്ഷിക്കാം.

ഇൻഗ്രീഡിയന്റ് പ്രെപ്പിങ്

പാചകത്തിന് തൊട്ടുമുൻപുള്ള ജോലികള്‍ മുൻകൂട്ടി ചെയ്യുക. പച്ചക്കറികള്‍ നേരത്തെ തന്നെ അരിഞ്ഞുവെക്കുക, ധാന്യങ്ങള്‍ വേവിച്ചു വെക്കുക, ഇഞ്ചി-വെളുത്തുള്ളി പേസ്റ്റ് തയ്യാറാക്കി വെക്കുക എന്നിവ ഇതില്‍ ഉള്‍പ്പെടുന്നു. ഒരേസമയം ഒന്നിലധികം വിഭവങ്ങള്‍ വേഗത്തില്‍ തയ്യാറാക്കാൻ പ്രഷർ കുക്കറോ ഓവനോ ഉപയോഗിക്കുന്നത് സമയം കൂടുതല്‍ ലാഭിക്കാൻ സഹായിക്കും.

ഭക്ഷണ സാധനങ്ങള്‍ സംഭരിക്കുമ്പോള്‍ ശ്രദ്ധിക്കേണ്ട കാര്യങ്ങള്‍

പാകം ചെയ്ത ഭക്ഷണം ചൂടാറിയ ശേഷം കൃത്യമായ കണ്ടെയ്നറുകളില്‍ അടച്ച്‌ ലേബല്‍ ഒട്ടിച്ച്‌ ഫ്രിഡ്ജില്‍ സൂക്ഷിക്കണം. ഇവ 3-4 ദിവസം വരെ എളുപ്പത്തില്‍ ഉപയോഗിക്കാം. എന്നാല്‍ സൂക്ഷിക്കുമ്പോള്‍ താഴെ പറയുന്ന സുരക്ഷാ മാനദണ്ഡങ്ങള്‍ പാലിക്കണം. ഫ്രിഡ്ജിലെ താപനില 5 ഡിഗ്രി സെല്‍ഷ്യസോ അതില്‍ താഴെയോ ആയിരിക്കണം. ഫ്രീസറിലാണെങ്കില്‍ ഇത് -18 ഡിഗ്രി സെല്‍ഷ്യസ് ആയിരിക്കണം. പാകം ചെയ്ത ഭക്ഷണം രണ്ട് മണിക്കൂറിനുള്ളില്‍ ഫ്രിഡ്ജിലേക്ക് മാറ്റണം. പരന്ന പാത്രങ്ങള്‍ ഉപയോഗിച്ചാല്‍ ഭക്ഷണം വേഗത്തില്‍ തണുക്കാൻ സഹായിക്കും. മാംസാഹാരങ്ങള്‍ കുറഞ്ഞത് 75 ഡിഗ്രി സെല്‍ഷ്യസ് താപനിലയിലെങ്കിലും വേവിച്ചെടുക്കണം. ഇത് ബാക്ടീരിയകളെ നശിപ്പിക്കാൻ സഹായിക്കും. പച്ചക്കറികള്‍ വാങ്ങിയ ശേഷം നന്നായി കഴുകി വൃത്തിയാക്കാൻ മറക്കരുത്.

English summary

Meal prepping on weekends helps reduce the morning rush and stress of daily cooking when schools reopen by allowing you to plan, chop, and half-cook your meals in advance. By storing your pre-prepared dishes safely at the correct temperatures in airtight containers, you can easily enjoy healthy, cost-effective, and time-saving meals throughout the week.