या पुरस्कार वितरणासाठी केंद्रीय गृहमंत्री अमित शहा (Amit Shah) , मुख्यमंत्री देवेंद्र फडणवीस (Devendra Fadnavis), उपमुख्यमंत्री एकनाथ शिंदे (Eknath Shinde) आणि सुनेत्रा पवार (Sunetra Pawar) उपस्थित होते, पुरस्कार प्रदान केल्यानंतर राष्ट्रीय सुरक्षा सल्लागार अजित डोवाल ( Ajit Doval) यांनी आपल्या भावना व्यक्त केल्या.

यावेळी बोलताना डोवाल म्हणाले की "मी या मंचावर येऊन स्वतःला एका मोठ्या संभ्रमात अनुभवत आहे. आदरणीय गृहमंत्री, मुख्यमंत्री, उपमुख्यमंत्री आणि ज्या सर्व लोकांनी माझ्याबद्दल भाष्य केले, त्या सर्वांचे मी आभार मानतो. माझ्याबद्दल आपण जी धारणा ठेवता, त्याबद्दल मी नमन करतो. आभार मानण्यासाठी माझ्याकडे शब्दही अपुरे आहेत," अशा शब्दांत भारताचे राष्ट्रीय सुरक्षा सल्लागार (NSA) अजित डोवाल यांनी आपल्या भावना व्यक्त केल्या. पुण्यात आयोजित करण्यात आलेल्या विशेष सोहळ्यात केंद्रीय गृहमंत्री अमित शाह यांच्या हस्ते अजित डोवाल यांना 'लोकमान्य टिळक राष्ट्रीय पुरस्कार' प्रदान करून सन्मानित करण्यात आले. हा पुरस्कार अत्यंत नम्रतेने स्वीकारत असल्याचे सांगत त्यांनी गौरवान्वित आणि नतमस्तक असल्याचे नमूद केले.

Ajit Doval Pune : 'पुण्यातील शालेय दिवसांच्या आठवणी अन् टिळकांचे विचार'

आपल्या भाषणात जुन्या आठवणींना उजाळा देताना डोवाल म्हणाले, "मी माझ्या शालेय जीवनाची सुरुवात पुण्यातूनच केली होती. सुमारे एक-दीड वर्ष मी इथे होतो. पुण्यात असताना मी प्रत्येक मंगळवारी चतुःशृंगी मंदिरात जायचो. शाळेत प्रार्थनेनंतर एक वरिष्ठ शिक्षक व्याख्यान द्यायचे; त्यांनी एका व्याख्यानात लोकमान्य टिळकांबद्दल सांगितले होते. मी माझ्या शालेय जीवनाच्या सुरुवातीला ते ऐकले होते, पण इतक्या वर्षांनंतर मला याच शहरात टिळकांच्या नावाने पुरस्कार दिला जाईल, असा विचार मी कधीही केला नव्हता."

Ajit Doval Pune : 'स्वातंत्र्य म्हणजे केवळ मनात येईल ते करणे नव्हे!'

आजच्या तरुण पिढीला उद्देशून डोवाल म्हणाले, "आजचा दिवस अत्यंत विशेष आहे. स्वातंत्र्यसंग्रामाचे प्रेरक, अद्भुत सेनानी, विचारवंत आणि मार्गदर्शक लोकमान्य टिळक यांची ही पुण्यतिथी आहे. आजच्या युवकांनी लोकमान्यांची राष्ट्र उभारणीची परिकल्पना काय होती, याचा गांभीर्याने विचार करण्याची गरज आहे. आजच्या तरुणांना वाटते की स्वातंत्र्य म्हणजे केवळ स्वतःच्या इच्छेने किंवा मनात येईल ते करणे; पण स्वातंत्र्य म्हणजे एवढेच नव्हते. ज्या काळी इंग्रजांविरुद्ध आवाज उठवण्याचे धैर्य कोणामध्येही नव्हते, समाजात वेदना आणि अत्याचार होते, त्या काळी लोकमान्य टिळकांनी संघर्षाचा कठीण मार्ग स्वीकारत देशाचे नेतृत्व केले."

Ajit Doval Pune : त्याग, सेवा आणि शौर्याचा संगम

महाराष्ट्रात पसरलेल्या प्लेगच्या साथीचा उल्लेख करताना डोवाल म्हणाले की, प्लेगच्या साथीदरम्यान टिळकांनी आपल्या २१ वर्षांच्या 'विश्वनाथ' या मुलाला गमावले, तरीही त्यांनी पुणे सोडले नाही आणि समाजसेवा सुरूच ठेवली. पुणे ही वीरांची आणि विचारवंतांची भूमी आहे. छत्रपती शिवाजी महाराज, पेशवा बाजीराव, तानाजी मालुसरे, मुरारबाजी देशपांडे यांच्या शौर्याचे दाखले या भूमीने दिले आहेत; तर महर्षी कर्वे, गोपाळ कृष्ण गोखले, गोपाळ गणेश आगरकर, सेनापती बापट यांच्यासारखे विचारवंत इथे घडले. टिळकांमध्ये शौर्य, दृढ संकल्प आणि आपल्या संस्कृती-धर्माबद्दल अपार आदर होता. त्यांनी तुरुंगवास भोगला, पण सामाजिक आणि राष्ट्रकार्य कधीही सोडले नाही," असे डोवाल यांनी स्पष्ट केले.

Ajit Doval Pune : 'आज टिळक असते तर म्हणाले असते... '

स्वातंत्र्यपूर्व काळातील संघर्षाची आठवण करून देताना डोवाल पुढे म्हणाले, "ब्रिटिशांच्या अत्याचाराविरुद्ध कोणी पुढे येत नव्हते, तेव्हा टिळकांनी पुढे येत 'स्वराज्य हा माझा जन्मसिद्ध अधिकार आहे' असा नारा दिला. आज जर लोकमान्य टिळक असते, तर त्यांनी नक्कीच म्हटले असते की, आपण स्वराज्य मिळवले आहे, आता भारताला सशक्त आणि विकसित बनवणे हा माझा जन्मसिद्ध हक्क आहे!"

Ajit Doval Pune : युवकांना राष्ट्रसेवेचे आणि एकजुटीचे आवाहन

देशाच्या सुरक्षेबाबत आणि रणनीतीबाबत बोलताना डोवाल म्हणाले, "आपल्या कोणत्याही कृत्याने जर देशाचे नुकसान होत असेल, तर आपण त्या वाटेने गेले नाही पाहिजे. जे राष्ट्रहित नाही, ते आपल्याही हितात नाही. आजही देशासमोर आतून आणि बाहेरून अनेक आव्हाने आहेत. अशा वेळी सर्वांनी एकजूट राहून देशसेवा केली पाहिजे. आज देशात असे वातावरण आहे की आपण भारताला अत्यंत शक्तिशाली बनवू शकतो. पंतप्रधान नरेंद्र मोदी आणि गृहमंत्री अमित शाह यांच्या नेतृत्वाखाली देश पुढे जात आहे. अमित शाह यांचे देशाप्रती असलेले प्रेम आणि त्यांनी केलेले कार्य मी जवळून पाहिले आहे. शेवटी, आजच्या युगाने आणि तरुणांनी देश घडवण्यासाठी आपले योगदान दिले पाहिजे, असे सांगत त्यांनी उपस्थितांना देशसेवेचा संकल्प करण्याचे आवाहन केले.