अधिक महिन्यामध्ये जावयाला धोंडे जेवण घालून सोन्याची अंगठी किंवा चांदीचे दागिने देण्याची प्रथा आहे, मात्र याला फाटा देत एक वेगळी भेट देण्यात आली.
सोन्याचे वाढलेले बाजार भाव आणि वाढती महागाई लक्षात घेता, सासऱ्याने सोन्याऐवजी थेट घोडी भेट देण्याचा निर्णय घेतला.
भूम तालुक्यातील ईट येथील जावई क्रांतीसिंह राऊत यांना त्यांचे सासरे विलास झांबरे यांनी धोंडे जेवणाची भेट म्हणून सिंधी जातीची घोडी दिली.
सासऱ्यांनी जावयाला कोणतीच पूर्वकल्पना न देता 'शेती उपयोगी पार्सल'पाठवले असून ते धोंडे जेवणानिमित्त स्वीकारावे, असे सांगितले.
ज्यावेळी जावई क्रांतीसिंह राऊत यांनी प्रत्यक्षात पार्सल पाहिले, तेव्हा तिथे उभी असलेली सुंदर सिंधी जातीची घोडे पाहून त्यांचा आनंद गगनात मावेनासा झाला.
जावई क्रांतीसिंह राऊत यांना घोड्यांची विशेष आवड असल्याने, सासऱ्याने त्यांची ही हौस पूर्ण केली.
सासऱ्याने अत्यंत प्रेमाने दिलेल्या या मौल्यवान आणि जिवंत भेटीचा जावई क्रांतीसिंह पूर्ण जबाबदारीने सांभाळ करणार आहेत.
पेट्रोल आणि डिझेलच्या वाढत्या महागाईवर मात करण्यासाठी आणि सोन्याच्या दरांना पर्याय म्हणून ही अनोखी भेट सध्या चर्चेचा विषय ठरली आहे.
धोंडे जेवणात सामान्यतः दिल्या जाणाऱ्या भेटवस्तूंपेक्षा ही भेट पूर्णपणे वेगळी असल्याने सोशल मीडियावरही याची जोरदार चर्चा होत आहे.
महागाईच्या काळात पारंपरिक पद्धतींना फाटा देऊन जावयाच्या आवडीनुसार उपयुक्त आणि आयुष्यभर लक्षात राहील अशी भेट देणाऱ्या सासऱ्याचे सर्वत्र कौतुक होत आहे.