दशरथ रायकर असं या मराठा आंदोलकाचं नाव असून ते बीड जिल्ह्यातील संगम येथील रहिवासी असल्याची माहिती समोर आली आहे. दशरथ रायकर हे मनोज जरांगे यांना पाठिंबा देण्यासाठी अंतरवाली सराटीत आले होते. रात्री उशिरा ते आंतरवाली येथील एका शेतात झोपले होते, मात्र ते सकाळी झोपेतून उठत नसल्याने त्यांना अंबड येथील रुग्णालयात दाखल करण्यात आलं मात्र डॉक्टरांनी त्यांना मृत घोषित केलं आहे. तर मनोज जरांगे पाटील (Manoj Jarange) यांनी पुन्हा एकदा आंतरवाली सराटी येथे उपोषण सुरू केले असून आज आंदोलनाचा सहावा दिवस आहे.

Manoj Jarange Protest : मनोज जरांगे पाटलांच्या समर्थनार्थ आज धाराशिव बंद

मनोज जरांगे पाटलांच्या समर्थनार्थ आज धाराशिव बंद ठेवण्यात येणार आहे. सलग दोन दिवस धाराशिवमध्ये आक्रमक होत मराठा समाजाने आंदोलन केले आहे, तर आज जिल्हा बंद ठेवण्यात येणार आहे. सरकारने लवकर प्रतिसाद दिला नाही, तर येत्या काळात अधिक आक्रमक आंदोलन करण्याचा इशारा देण्यात आला आहे, मराठा समाजाकडून पुकारण्यात आलेल्या बंदला व्यापारी संघटनांही पाठिंबा दिला आहे.(Manoj Jarange)

मराठा आरक्षणासाठी उपोषणाला बसलेल्या मनोज जरांगे पाटलांच्या आंदोलनाचे धाराशिवमध्ये तीव्र पडसाद उमटत आहेत. मराठा समाजाकडून आज जिल्हाभर बंद पाळला जात आहे. गेली दोन दिवस धाराशिवमध्ये मराठा समाज बांधव रस्त्यावर येत असून आक्रमक पद्धतीने आंदोलन केले जात आहे. सर्वांनी या बंदमध्ये स्वखुशीने सहभागी व्हावं असं आवाहन मराठा कार्यकर्त्यांकडून करण्यात आला आहे. तरी येत्या काळात सरकारने लवकर प्रतिसाद दिला नाही तर अधिक आक्रमक आंदोलन करू असा इशाराही दिला आहे. मराठा समाजाकडून पुकारण्यात आलेल्या बंदला व्यापारी संघटनांनी पाठिंबा दर्शवला आहे. (Manoj Jarange)

Manoj Jarange Protest : मनोज जरांगे यांच्या समर्थनार्थ आज परभणी जिल्हा बंद

मनोज जरांगे पाटील यांनी अंतरवाली सराटी येथे सुरू केलेल्या उपोषणाला आज सहावा दिवस आहे. त्यांच्या आंदोलनाला पाठिंबा देण्यासाठी सकल मराठा समाजाच्यावतीने आज परभणी जिल्हा बंदची हाक देण्यात आली आहे. जिल्ह्यातील विविध ठिकाणी बंदला प्रतिसाद देण्याचे आवाहन करण्यात आले असून, हा बंद शांततेच्या मार्गाने पार पाडण्याचे आवाहन सकल मराठा समाजाकडून करण्यात आले आहे.

राज्यात नोंदी निघत असलेल्या ठिकाणी कुणबी प्रमाणपत्र देणे,त्यांच्या व्हॅलिडिटी देणे,मराठा आंदोलकांवरील गुन्हे मागे घेणे अशा मराठा आरक्षण बाबत विविध मागण्यांसाठी अंतरवाली सराटी मनोज जरांगे हे उपोषण करत आहेत. या आंदोलनाला राज्यभरातून मराठा समाजाचा पाठिंबा मिळत असताना, आता परभणी जिल्ह्यातही आंदोलनाची तीव्रता वाढताना पाहायला मिळत आहे.सकल मराठा समाजाच्या वतीने आज परभणी जिल्हा बंदची हाक देण्यात आली आहे. जिल्ह्यातील व्यापारी, व्यावसायिक आणि नागरिकांनी बंदमध्ये सहभागी व्हावे, असे आवाहन करण्यात आले आहे.शाळा महाविद्यालयांना ही सुट्टी देण्यात आली आहे.काल जिल्ह्यात विविध ठिकाणी रस्ता रोजी ही करण्यात आले होते.

Manoj Jarange Protest : मनोज जरांगे पाटील यांच्या समर्थनार्थ हिंगोली जिल्ह्यात अनेक ठिकाणी बंद

मराठा आरक्षणाच्या मागणीसाठी उपोषणाला बसलेल्या मनोज जरांगे पाटील यांच्या आंदोलनाला पाठिंबा देण्यासाठी हिंगोली जिल्ह्यातील अनेक ठिकाणी आज बंदची हाक देण्यात आली आहे. सकल मराठा समाजाच्या वतीने या बंदचे आवाहन करण्यात आले असून, जिल्ह्यातील विविध शहरांसह बाजारपेठांमध्ये बंदला प्रतिसाद मिळताना दिसत आहे.सेनगाव शहरासह गोरेगाव येथील बाजारपेठा बंद ठेवण्यात आल्या आहेत. तसेच औंढा नागनाथ तालुक्यातील जवळा बाजार आणि आखाडा बाळापूर येथील बाजारपेठाही बंद ठेवण्यात आल्या आहेत. सेनगाव शहरातील व्यापाऱ्यांनी आपली दुकाने आणि प्रतिष्ठाने बंद ठेवत आंदोलनाला पाठिंबा दर्शवला आहे. त्यामुळे सकाळपासून शहरातील बाजारपेठांमध्ये शुकशुकाट पाहायला मिळत आहे.