MS Dhoni And Rishabh Pant Video: भारतीय क्रिकेटपटू ऋषभ पंत (Rishabh Pant) आणि माजी कर्णधार एमएस धोनी (MS Dhoni) यांचा एक व्हायरल व्हिडीओ सध्या सोशल मीडियावर चर्चेचा विषय ठरत आहे. क्रिकेटपासून दूर असतानाही दोन्ही खेळाडूंमधील मैत्री आणि बॉन्डिंग पुन्हा एकदा चाहत्यांचे लक्ष वेधून घेत आहे.
श्रीलंकेविरुद्ध नुकत्याच पार पडलेल्या कसोटी मालिकेपूर्वी ऋषभ पंत मार्गदर्शन घेण्यासाठी धोनीच्या रांची शहरात पोहोचला होता. यावेळी धोनीच्या मार्गदर्शनाखाली पंतने नेट बॉलर्सविरुद्ध सरावही केल्याचे समोर आले होते.
व्हायरल व्हिडीओमध्ये नेमकं काय? (MS Dhoni And Rishabh Pant Video)
सोशल मीडियावर व्हायरल व्हिडीओमध्ये एमएस धोनी आणि ऋषभ पंत आपल्या मित्रांसोबत पार्टीचा आनंद घेताना दिसत आहेत. पंत सोफ्यावर बसलेल्या एका वयोवृद्ध व्यक्तीजवळून धोनीला 'माही भाई' म्हणत ग्रुप फोटोसाठी बोलावताना दिसतो. त्यानंतर धोनी त्यांच्याकडे येतो आणि पंतला हसत 'जरा हुक्का पिऊन येतो' असं बोलतो. पंत आणि धोनी यांच्यातील हा अनौपचारिक संवाद सोशल मीडियावर चांगलाच व्हायरल झाला आहे.
व्हिडीओमध्ये पंत आणि धोनी नेमकं काय म्हणाले? (MS Dhoni And Rishabh Pant Video)
एमएस धोनी आणि ऋषभ पंत यांचा समावेश असलेल्या मुलांच्या हाऊस पार्टीतील कथित व्हिडीओ सोशल मीडियावर वेगाने व्हायरल होत आहे. या व्हायरल क्लिपमध्ये धोनी मी हुक्का प्यायला जाऊन येतो, असे म्हणताना ऐकू येत असल्याचा दावा केला जात आहे. त्यानंतर ऋषभ पंत मीही येतो, असे उत्तर देताना ऐकू येतात. या दोन्ही क्रिकेटपटूंमधील कथित संभाषणामुळे सोशल मीडियावर मोठी चर्चा सुरू झाली आहे. चाहते या व्हिडीओला वेगवेगळ्या प्रतिक्रिया देत असून, अनेक जण हा व्हिडीओ शेअर करत आहेत. दरम्यान, काही सोशल मीडिया युजर्सनी दोन्ही खेळाडूंच्या आरोग्याबाबतही चिंता व्यक्त केली आहे. तंबाखूचा धूर आरोग्यासाठी हानिकारक असल्याचे सर्वश्रुत असताना, व्यावसायिक क्रिकेटपटू कथितपणे हुक्का किंवा धूम्रपान करताना दिसणे योग्य आहे का, असा सवाल उपस्थित केला जात आहे. या व्हायरल क्लिपमुळे व्यावसायिक खेळाडूंची फिटनेस, आरोग्य आणि जीवनशैली यावरही सोशल मीडियावर चर्चा रंगली आहे.
श्रीलंका कसोटी मालिकेत पंतची शानदार कामगिरी- (Rishabh Pant Ind vs SL)
श्रीलंकेविरुद्ध नुकत्याच संपलेल्या दोन सामन्यांच्या कसोटी मालिकेत शुभमन गिलच्या नेतृत्वाखालील भारतीय संघाने 1-0 अशी मालिका जिंकली. गॉल येथे झालेल्या पहिल्या कसोटीत भारताने विजय मिळवला, तर कोलंबोमध्ये झालेली दुसरी कसोटी अनिर्णित राहिली. या मालिकेत ऋषभ पंतने 3 डावांमध्ये 56 च्या सरासरीने 168 धावा केल्या. यामध्ये दोन अर्धशतकांचा समावेश होता. भारतीय संघाच्या विजयात पंतची भूमिका महत्त्वाची ठरली.
न्यूझीलंडविरुद्धच्या कसोटी मालिकेत पंत मैदानात उतरणार? (Ind vs NZ)
श्रीलंका दौऱ्यानंतर ऋषभ पंतने बंगळुरू येथील बीसीसीआय सेंटर ऑफ एक्सलन्समध्ये रवींद्र जडेजा, यशस्वी जैस्वाल आणि श्रेयस अय्यर यांच्यासोबत अनिवार्य फिटनेस टेस्ट पूर्ण केली आहे. आगामी अफगाणिस्तानविरुद्धच्या टी-20 मालिकेसाठी पंतचा भारतीय संघात समावेश करण्यात आलेला नाही. संजू सॅमसन आणि ईशान किशन यांची यष्टीरक्षक म्हणून निवड करण्यात आली आहे. 2027च्या वनडे विश्वचषकाचा विचार करता, वनडे संघात केएल राहुल आणि ईशान किशन यांना प्राधान्य मिळण्याची शक्यता असल्याने आगामी वेस्ट इंडिजविरुद्धच्या घरच्या वनडे मालिकेतही पंतला संधी मिळणे कठीण दिसत आहे. त्यामुळे ऋषभ पंतची मैदानावरील पुनरागमन 19 नोव्हेंबरपासून वेलिंग्टन येथे सुरू होणाऱ्या न्यूझीलंडविरुद्धच्या तीन सामन्यांच्या महत्त्वपूर्ण कसोटी मालिकेत होण्याची शक्यता आहे.
राज्यासह देश-विदेशातील महत्वाच्या घडामोडी, VIDEO:
संबंधिता बातमी:
Author : मुकेश चव्हाण