Karnataka Politics Crisis : गेल्या काही दिवसांपासून कर्नाटकच्या राजकीय वर्तुळात सुरू असलेल्या सर्व चर्चा आणि तर्क-वितर्कांना अखेर पूर्णविराम मिळाला आहे. कर्नाटकचे मुख्यमंत्री सिद्धारमय्या यांनी आपल्या मुख्यमंत्रिपदाचा राजीनामा दिला.
पक्षाच्या वरिष्ठ नेत्यांच्या सूचनेनुसार मी हे पाऊल उचलल्याचं त्यांनी स्पष्ट केलं. हायकमांडने मला जसं सांगितलं तसं केलं, असं म्हणताना सिद्धारमय्या काहीसे भावुक झाल्याचं दिसून आलं. त्यांच्या राजीनाम्यानंतर आता डी के शिवकुमार यांच्याकडे मुख्यमंत्रिपद जाणार आहे.
Siddaramaiah Emotional Speech : राजीनामा देताना सिद्धारमय्या भावुक
मुख्यमंत्री पदाचा राजीनामा देताना सिद्धारमय्या कमालीचे भावुक झाले होते. 2006 मध्ये काँग्रेस पक्षात प्रवेश केल्यापासून ते आतापर्यंत मिळालेल्या अफाट समर्थनाबद्दल त्यांनी सोनिया गांधी, राहुल गांधी, मल्लिकार्जुन खर्गे यांच्यासह काँग्रेस कार्यकर्ते, आमदार आणि खासदारांचे जाहीर आभार मानले. ते म्हणाले की, "देशात संविधान सर्वोच्च आहे आणि आम्ही नेहमीच संविधानाने दाखवलेल्या मार्गावर चालण्याचा प्रयत्न केला आहे. कर्नाटकातील जनतेने आम्हाला नेहमीच भरभरून प्रेम दिले, आमचे समर्थक आणि हितचिंतक प्रत्येक कठीण प्रसंगात आमच्या पाठीशी खंबीरपणे उभे राहिले."
Karnataka Chief Minister : दोनदा मुख्यमंत्री होण्याची संधी
आपल्या राजकीय प्रवासाचे आणि मुख्यमंत्री तसेच विरोधी पक्षनेते (LoP) म्हणून घालवलेल्या कार्यकाळाचे स्मरण करताना सिद्धारमय्या यांनी कृतज्ञता व्यक्त केली. "मला कर्नाटकच्या 7 कोटी जनतेची सेवा करण्याची सुवर्णसंधी मिळाली. या प्रवासात मला दोन वेळा राज्याचा मुख्यमंत्री आणि दोन वेळा विरोधी पक्षनेता बनण्याची संधी लाभली. सोनिया गांधी, राहुल गांधी आणि आमचे राष्ट्रीय अध्यक्ष मल्लिकार्जुन खर्गे यांनी माझ्यावर विश्वास दाखवून मला ही संधी दिली, त्याबद्दल मी त्यांचा ऋणी आहे. काँग्रेस पक्ष सोबत नसता, तर मी कधीच मुख्यमंत्री बनू शकलो नसतो," अशा भावना त्यांनी व्यक्त केल्या.
Siddaramaiah Attacks PM Modi : पंतप्रधान मोदी आणि विरोधकांवर निशाणा
राजीनामा दिल्यानंतर पत्रकारांशी बोलताना सिद्धारमय्या यांनी विरोधी पक्षांवर अत्यंत तीक्ष्ण शब्दांत हल्लाबोल केला. काँग्रेस सरकारने कर्नाटकच्या जनतेला दिलेल्या 'गॅरंटी' योजनांमुळे राज्याचा खजिना रिकामा होईल, अशी खोटी माहिती विरोधकांकडून पसरवली गेली. या खोट्या प्रचारात स्वतः पंतप्रधान नरेंद्र मोदी (PM Narendra Modi) देखील सामील होते, असा गंभीर आरोप त्यांनी केला. काँग्रेसच्या कल्याणकारी योजनांमुळे राज्याचे कोणतेही नुकसान झाले नसल्याचा दावा त्यांनी यावेळी पुन्हा केला.
Next Karnataka CM Race : पुढील मुख्यमंत्र्यांसाठी मार्ग मोकळा
आपल्या राजीनाम्याबाबत स्पष्टीकरण देताना सिद्धारमय्या म्हणाले, "हायकमांड जेव्हा मला आदेश देईल, तेव्हा मी राजीनामा देईन, असे मी आधीच स्पष्ट केले होते. त्यानुसार मी आज माझे पद सोडले आहे." सिद्धारमय्या यांच्या या राजीनाम्यामुळे आता कर्नाटकच्या पुढील मुख्यमंत्र्यांच्या निवडीचा मार्ग मोकळा झाल्याचे समजते आहे. या निर्णयामुळे मनात कोणतीही निराशा नाही. आमच्या पक्षाने कर्नाटकात 135 हून अधिक जागा जिंकून पूर्ण बहुमताने सरकार स्थापन केले होते, तसेच दोन अपक्ष आमदारांनीही आमच्या सरकारला पाठिंबा दिला होता. जनतेप्रती आणि राज्याच्या कल्याणाप्रती आमची जबाबदारी यापुढेही कायम राहील," असा विश्वास त्यांनी व्यक्त केला.
Author : एबीपी माझा ब्युरो