काही दिवसांपूर्वी मालिकेत एक ट्वीस्ट आलेला. समरची जुनी मैत्रीण किमयाच्या येण्यामुळे स्वानंदीला समरवर असलेल्या प्रेमाची जाणीव होते. एका पार्टीत दारू पिऊन स्वानंदी समरसमोर तिच्या मनातील भावना, प्रेम भडाभडा बोलून टाकते. पण, इथेही ट्वीस्ट आहेच. समरला वाटतं स्वानंदी दारू प्यायलीय, त्यामुळे बडबडतेय आणि तो तिच्या बोलण्यावर अजिबात विश्वास ठेवत नाही. पण आता स्वतः समर प्रेमाची कबुली देणार आहे. मालिकेत स्वानंदीची भूमिका तेजश्री प्रधान (Tejashree Pradhan) हिनं आणि समरची भूमिका सुबोध भावेनं (Subodh Bhave) साकारली आहे. या दोघांसोबतच मालिकेतली इतर पात्रंही चर्चेत असतात.

'वीण दोघांची ही तुटेना' मालिकेत स्वानंदी, समरसोबतच इतर पात्रही लक्ष वेधून घेतात. या मालिकेत स्वानंदीचा भाऊ रोहन आणि समरची बहीण अधिरासुद्धा चर्चेत असतात. कारण, त्या दोघांच्या नात्यावरच स्वानंदी आणि समरच्या नात्याचा पाया रोवला गेलाय. रोहन आणि स्वानंदी मध्यमवर्गीय कुटुंबातील आहे. तर, समर आणि अधिरा उच्चभ्रू कुटुंबातले आहेत. अधिरा आणि रोहन एकमेंकांच्या प्रेमात पडतात आणि लग्नाचा निर्णय घेतात. दोघांनी एकमेकांच्या घरी सांगितल्यावर सर्वात आधी कुटुंबाचा गोंधळ उडतो. पण, दोघांच्या लग्नाला सारे तयार होतात. तेवढ्यात रोहन सर्वांसमोर अट ठेवतो की आधी त्याच्या बहिणीचे स्वानंदीचे लग्न झाले पाहिजे. त्यानंतर परिस्थिती अशी निर्माण होते की समर, स्वानंदी यांना एकमेकांशी लग्न करावं लागतं.

जिच्या पायाशी सारी सुखं लोळण घेत होती, ती अधिरा रोहनशी लग्न करुन मध्यमवर्गीय कुटुंबाची सून होते आणि मध्यमवर्गीय कुटुंबात वाढलेली स्वानंदी श्रीमंत समर राजवाडेंची बायको होते. मालिकेत स्वानंदीचा भाऊ रोहनची भूमिका अभिनेता राज मोरे यानं साकारली आहे. तर, अधिराची भूमिका अभिनेत्री डॉक्टर पूर्णिमा डे हिनं साकारली आहे. 'वीण दोघांची ही तुटेना' मालिकेतली अधिराच्या पायाला खऱ्या आयुष्यात मोठी दुखापत झाली आहे. तिचा व्हीलचेअरवरचा फोटो रोहननं म्हणजे, राज मोरेनं शेअर केला आहे.