उद्या, गुरुवारी 6 ऑगस्ट 2026 रोजी दुपारी 12:00 वाजता वांद्रे (पश्चिम) येथील रंगशारदा सभागृहात हा संगणकीय सोडतीचा सोहळा पार पडणार आहे. आचारसंहिता आणि इतर प्रशासकीय कारणांमुळे रखडलेली ही प्रक्रिया मार्गी लागल्याने 75 हजारांहून अधिक अर्जदारांमध्ये आनंदाचे वातावरण आहे.

मुदतवाढीचा सस्पेन्स आणि वाढलेली धाकधूक
30 मार्च 2026 रोजी या भव्य गृहनिर्माण योजनेची जाहिरात प्रसिद्ध करण्यात आली होती. सुरुवातीला ही सोडत मे किंवा जून महिन्यात अपेक्षित होती. परंतु, विधान परिषद निवडणुकीची आचारसंहिता आणि व्हीआयपी नेत्यांच्या व्यस्त वेळापत्रकामुळे सोडतीची तारीख वारंवार पुढे ढकलली जात होती. परिणामी, 75,366 वैध अर्जदारांची कोट्यवधी रुपयांची अनामत रक्कम (EMD) म्हाडाकडे अडकून पडली होती, ज्यामुळे सर्वसामान्य नागरिक आणि राजकीय वर्तुळातून तीव्र नाराजी व्यक्त होत होती. अखेर म्हाडाने तारीख निश्चित करत या सर्व वादांवर पडदा टाकला आहे. MHADA Lottery 2026

एका घरासाठी 29 जणांमध्ये काट्याची टक्कर
यंदाच्या लॉटरीत मुंबईतल्या मोक्याच्या जागांवर घरे असल्याने नागरिकांचा उदंड प्रतिसाद लाभला आहे. 2640 सदनिकांसाठी तब्बल 76,366 लोकांनी नशीब आजमावले असून, सरासरी प्रत्येक घरासाठी 29 अर्जदार शर्यतीत आहेत. या सोडतीत सर्व उत्पन्न गटांचा समतोल राखण्यात आला आहे. MHADA Lottery 2026

• आर्थिकदृष्ट्या दुर्बल घटक (EWS) : 145 घरे
• निम्न उत्पन्न गट (LIG) : 858 घरे
• मध्यम उत्पन्न गट (MIG) : 798 घरे
• उच्च उत्पन्न गट (HIG) : 839 घरे

यामध्ये नव्याने बांधलेल्या इमारतींसह पुनर्विकास प्रकल्पांतर्गत (DCR 33/5 आणि 33/7) विकासकांकडून मिळालेले फ्लॅट्स आणि जुन्या लॉटरीतील 319 शिल्लक घरांचाही समावेश आहे. MHADA Lottery 2026

गोरेगावला सर्वाधिक पसंती; विक्रोळीत 7.5% सूट
या संपूर्ण सोडतीमध्ये गोरेगाव येथील पंतप्रधान आवास योजनेच्या घरांनी लोकप्रियतेचे सर्व रेकॉर्ड मोडले आहेत. येथील अवघ्या 13 घरांसाठी 17,755 अर्ज आले असून एका घरासाठी 1365 जण स्पर्धेत आहेत. या घरांची किंमत 32.36 लाख रुपये आहे. दुसरीकडे, म्हाडाने विक्रोळीच्या कन्नमवार नगरमधील 1221 अंडर-कन्स्ट्रक्शन घरांच्या किमतीत 7.5% ची घसघशीत कपात करून मध्यमवर्गीयांना मोठा दिलासा दिला आहे, ज्यातील 610 घरे उच्च उत्पन्न गटासाठी राखीव आहेत. MHADA Lottery 2026

29 लाखांपासून 6.82 कोटींपर्यंतचे पर्याय
या लॉटरीचे वैशिष्ट्य म्हणजे यामध्ये सर्व आर्थिक स्तरांतील लोकांसाठी घरे उपलब्ध आहेत. मानखुर्द येथील पीएमजीपी योजनेतील 4 घरांसाठी सर्वात कमी म्हणजेच 29 लाख 37 हजार रुपये किंमत असून त्यासाठी 48 जणांनी अर्ज केला आहे. तर दुसरीकडे, दक्षिण मुंबईतील ताडदेव येथील अति-प्रीमियम ‘क्रिसेंट टॉवर’मधील 6 कोटी 82 लाख रुपयांच्या 2 आलिशान घरांसाठी 21 श्रीमंत अर्जदारांनी नशीब आजमावले आहे. MHADA Lottery 2026

उद्या होणारी ही सोडत पूर्णपणे संगणकीकृत आणि मानवी हस्तक्षेपाशिवाय अत्यंत पारदर्शक पद्धतीने पार पडेल. जे अर्जदार रंगशारदा सभागृहात प्रत्यक्ष उपस्थित राहू शकणार नाहीत, त्यांच्यासाठी म्हाडाच्या अधिकृत वेब पोर्टलवर आणि सोशल मीडिया चॅनेल्सवर या सोडतीचे थेट प्रक्षेपण केले जाणार आहे. सोडत पूर्ण झाल्यानंतर तात्काळ यशस्वी विजेत्यांची आणि प्रतीक्षा यादीतील उमेदवारांची नावे म्हाडाच्या संकेतस्थळावर प्रसिद्ध केली जातील. MHADA Lottery 2026