ग्रामपंचायत कार्यालयापासून निघालेल्या या रॅलीत हजारो महिला, युवक, विद्यार्थी आणि ज्येष्ठ नागरिक हातात जनजागृतीपर फलक घेऊन रस्त्यावर उतरल्याने संपूर्ण गाव दारूबंदीच्या घोषणांनी दुमदुमून गेले.

दारूच्या व्यसनामुळे अनेक कुटुंबे उद्ध्वस्त होत असून आर्थिक व कौटुंबिक संकटे उभी राहत आहेत. यावर आळा घालण्यासाठी गावातील तरुण पिढीला व्यसनापासून वाचवण्याचा निर्धार करण्यात आला. महारॅलीदरम्यान अवैध दारूविक्री करणाऱ्यांच्या घरासमोर घोषणाबाजी करून दारूविक्री तात्काळ बंद करण्याचा इशारा देण्यात आला. रॅलीच्या एक दिवस आधी गोरेगाव पोलीस ठाण्यात निवेदन देऊन कायदेशीर कारवाईची मागणीही करण्यात आली आहे.

मुद्दे व घडामोडी:महिला व विद्यार्थ्यांचा पुढाकार: दारूचा फटका कुटुंबाला बसत असल्याने महिलांनी या लढ्यात आघाडी घेतली; तर जिल्हा परिषद वरिष्ठ प्राथमिक शाळेच्या विद्यार्थ्यांनी रॅलीत सहभाग घेऊन मोहिमेला भावनिक अधिष्ठान दिले.शांततेचा इशारा: अवैध दारूविक्रीमुळे गावातील शांतता व सुव्यवस्था बिघडल्यास त्यास प्रशासन जबाबदार राहील, अशी भूमिका गावकऱ्यांनी मांडली.प्रशासनाच्या भूमिकेकडे लक्ष: ग्रामस्थांनी आंदोलनातून ताकद दाखवून दिल्यानंतर आता पोलीस व महसूल प्रशासन अवैध दारूविक्रीवर कशी अन् किती गतीने कारवाई करते, याकडे संपूर्ण तालुक्याचे लक्ष लागले आहे.

या जनजागृती मोहिमेत दारूबंदी समितीचे अध्यक्ष नरेंद्र खोब्रागडे, सरपंच अतुल मोटघरे, उपसरपंच बाबुलाल मस्करे, तंटामुक्ती अध्यक्ष रवींद्र रहांगडाले, उज्ज्वल राऊत, रेवचंद कवास, बाळकृष्ण मेश्राम, प्रीतमलाल नंदेश्वर, लोकचंद शरणागत, स्वाती टेंभूर्णीकर, पिंकी मंडिये, अलका राऊत, ललिता लिल्हारे, प्रमिला भोयर, भामेश्वरी पटले, पोलीस पाटील सीमाताई नंदेश्वर यांच्यासह सर्व ग्रामपंचायत सदस्य, शिक्षक, विद्यार्थी आणि ग्रामस्थ मोठ्या संख्येने उपस्थित होते.