या अपघातामुळे टँकरमधील इथेनॉल या ज्वलनशील केमिकलची मोठी गळती सुरू झाली असून, हे घातक रसायन थेट जगबुडी नदीच्या पात्रात मिसळल्याने परिसरात खळबळ उडाली आहे.

मिळालेल्या माहितीनुसार, हा टँकर घातक केमिकलची वाहतूक करत होता. जगबुडी नदीच्या पुलावर चालकाचे नियंत्रण सुटल्याने टँकर भीषण रित्या पलटी झाला. अपघाताचा फटका इतका जोरात होता की, टँकरला मोठी गळती लागली. टँकरमधील हजारो लिटर इथेनॉल थेट पुलाखालून वाहणाऱ्या जगबुडी नदीत सांडू लागले. यामुळे नदीचे पाणी पांढरट झाले असून संपूर्ण परिसरात रसायनाचा उग्र वास पसरला आहे.

ही घटना ज्या ठिकाणी घडली, त्याच परिसरात खेड शहरासह आजूबाजूच्या अनेक गावांना पाणीपुरवठा करणाऱ्या नळपाणी योजनांच्या जॅकवेल विहिरी आहेत. नदीच्या पात्रात थेट केमिकल मिसळल्याने हे पाणी आता पिण्यायोग्य राहिलेले नाही. त्यामुळे खबरदारीचा उपाय म्हणून अनेक गावांचा पाणीपुरवठा तातडीने बंद करण्यात आला आहे. नदीचे पाणी दूषित झाल्याने जलचरांनाही मोठा धोका निर्माण झाला आहे.