सिद्धरामय्या यांनी यावेळी सर्व मंत्र्यांच्या सहकार्याबद्दल त्यांचे आभार मानले असून, या घडामोडीमुळे कर्नाटकात सत्तानाट्याला वेग आला आहे.

कर्नाटकातील मुख्यमंत्रीपदाबाबत सुरू असलेल्या तर्कवितर्कांच्या दरम्यान, मुख्यमंत्री सिद्धरामय्या आणि उपमुख्यमंत्री डीके शिवकुमार बेंगळुरू येथील मुख्यमंत्र्यांच्या निवासस्थानी आयोजित 'नाश्ता बैठकीत' एकत्र दिसले. यावेळी दोन्ही नेत्यांनी एकमेकांना मिठी मारली. बैठकीदरम्यान डीके शिवकुमार यांनी मुख्यमंत्री सिद्धरामय्या यांच्या पाया पडत त्यांचे आशीर्वादही घेतले. राज्यातील नेतृत्वबदलाबाबत राजकीय चर्चांना उधाण आले असतानाच या दोन्ही नेत्यांची ही भेट झाली आहे.

बैठकीदरम्यान सिद्धरामय्या यांनी आपल्या मंत्रिमंडळातील सहकाऱ्यांना पद सोडण्याच्या निर्णयाची माहिती दिली. मुख्यमंत्री कार्यालयाने (CMO) प्रसिद्ध केलेल्या फोटोंमध्ये सिद्धरामय्या हे भावूक झालेल्या डीके शिवकुमार यांना मिठी मारताना दिसत आहेत.

कर्नाटक सरकारचे मंत्री एच. के. पाटील यांनी माहिती दिली की, मुख्यमंत्री सिद्धरामय्या आज दुपारी ३ वाजता आपल्या पदाचा राजीनामा देतील. स्वतः सिद्धरामय्या यांनीच जाहीर केले आहे की, डीके शिवकुमार हे कर्नाटकचे नवे मुख्यमंत्री असतील.