राजकुमार राव आणि साऊथ अभिनेत्री कीर्ती सुरेश यांच्या प्रमुख भूमिका असलेला 'रफ्तार' हा चित्रपट लवकरच सिनेमागृहांमध्ये प्रदर्शित होणार आहे. आधी जुलैमध्ये रिलीज होणार असलेला हा चित्रपट आता दसऱ्याच्या लांब वीकेंडला प्रेक्षकांच्या भेटीला येणार आहे.
'रफ्तार'ला अमेझाॅन च पाठिंबा असून, पत्रलेखा आणि राजकुमार राव यांच्या 'कम्पा फिल्म' बॅनरखाली या चित्रपटाची निर्मिती करण्यात आली आहे.
या चित्रपटाद्वारे पत्रलेखा आणि राजकुमार राव निर्माता म्हणून पहिल्यांदाच मोठ्या पडद्यावर उतरले आहेत. चित्रपटाचे दिग्दर्शन आदित्य निंबाळकर यांनी केले असून कार्यकारी निर्माते तरुण बाली आहेत. कथा आणि पटकथा रोहन नारुला यांनी लिहिली आहे. या चित्रपटात अनुराग ठाकूर, रोहन वर्मा, तान्या माणिकतला आणि रजत कपूर हे कलाकारही महत्त्वाच्या भूमिकांमध्ये दिसणार आहेत.
'रफ्तार' हा ड्रामा प्रकारातील चित्रपट असून तो महत्त्वाकांक्षा, सत्ता आणि यशाच्या शर्यतीत मोजावी लागणारी भावनिक किंमत यावर प्रकाश टाकतो. भारतातील वेगाने वाढणाऱ्या एड-टेक उद्योगाच्या पार्श्वभूमीवर कथा उभी राहते. एका स्टार्टअपच्या जलद यशानंतर निर्माण होणारे संघर्ष, नैतिक द्वंद्व आणि वैयक्तिक नात्यांवर होणारा परिणाम या चित्रपटातून मांडण्यात आला आहे.
उद्योगातील स्पर्धा, गुंतवणुकीचा दबाव आणि यशाची अनिश्चितता यामुळे पात्रांचे आयुष्य कसे बदलते, हे चित्रपटात दाखवले जाणार आहे. 'रफ्तार' प्रेक्षकांना आधुनिक कॉर्पोरेट जगातील वास्तवाचे प्रतिबिंब दाखवणारा अनुभव देईल, असा अंदाज व्यक्त केला जात आहे.