सिंहगड रस्त्यावर हॉटेलच्या उद्घाटनाची जाहिरात करणाऱ्या फ्लेक्सवर पोलीस उपायुक्त दर्जाच्या अधिकाऱ्याचे मोठे छायाचित्र आणि नाव छापण्यात आले आहे. विशेष म्हणजे, याच फ्लेक्सच्या शेजारी बेकायदा होर्डिंग लावणाऱ्यांवर गुन्हे दाखल करण्याचा इशारा देणारा पुणे महापालिकेचा फलक आहे. या प्रकारामुळे नागरिकांमध्ये आश्चर्य व्यक्त होत असून, संबंधितांवर तातडीने कारवाई करण्याचे आश्वासन महापालिकेने दिले आहे.

अलिकडच्या काळात शहरात जाहिरात आणि प्रसिद्धीसाठी फ्लेक्स लावण्याचे प्रमाण मोठ्या प्रमाणावर वाढले आहे. राजकीय पाठबळ असलेल्या फ्लेक्स प्रिंटिंग व्यावसायिकांकडून शहरात गजबजलेले चौक, रस्ते आणि पदपथांवर बिनदिक्कतपणे अनधिकृत फलक लावले जातात. वर्षभर आजी-माजी नगरसेवक, राजकीय कार्यकर्ते आणि विविध पदाधिकाऱ्यांचे फ्लेक्स शहरभर झळकत असतात. मात्र, आता या जाहिरातबाजीमध्ये थेट पोलिसांच्या नावांचा वापर केला जात आहे.

असाच एक गंभीर प्रकार सिंहगड रस्त्यावर समोर आला आहे. पु. ल. देशपांडे उद्यानापासून ते धायरी फाट्यापर्यंत एका हॉटेलच्या उद्घाटनाचे अनेक बेकायदा फ्लेक्स लावले गेले आहेत. यातील एक फ्लेक्स राजाराम पुलाच्या चौकात पुणे महापालिकेने लावलेल्या इशारा फलकाच्या अगदी शेजारीच उभारण्यात आला आहे.

विशेष म्हणजे, पालिकेच्या फलकावर 'अनधिकृत होर्डिंग लावणाऱ्यांवर गुन्हे दाखल केले जातील' असा इशारा दिलेला असताना, शेजारीच लावलेल्या फ्लेक्सवर थेट पोलीस उपायुक्त दर्जाच्या अधिकाऱ्याचे नाव आणि मोठे छायाचित्र 'उद्घाटक' म्हणून झळकत आहे. यापूर्वी राजाराम पुलाजवळ लावण्यात आलेल्या एका फ्लेक्सवर नांदेड सिटी, सिंहगड रोड आणि अलंकार पोलीस ठाण्यांतील अधिकाऱ्यांची नावे छापण्यात आली होती. जागरूक नागरिकांनी तक्रार केल्यानंतर दोन दिवसांनी ते फलक हटवण्यात आले, मात्र त्यानंतर पुन्हा तसेच फलक उभारण्यात आले आहेत.

या प्रकारांकडे पुरेसे लक्ष दिले जात नसल्याने जागरूक नागरिकांमध्ये चिंता व्यक्त होत आहे. सार्वजनिक ठिकाणी बेकायदा फ्लेक्स लावण्यावर नियंत्रण ठेवण्याची जबाबदारी संबंधित यंत्रणांची असताना, अशा जाहिरातींवर पोलीस अधिकाऱ्यांचीच नावे आणि छायाचित्रे झळकणे ही गंभीर बाब मानली जात आहे. नियमांचे उल्लंघन करणाऱ्यांवर प्रत्यक्ष कारवाई होणार का, आणि अशा फलकांवर नावे व छायाचित्रे वापरणाऱ्या व्यक्तींची जबाबदारी निश्चित केली जाणार का, असे प्रश्न या निमित्ताने उपस्थित होत आहेत.

पोलीस नियमावलीचे उघड उल्लंघन

पोलीस अधिकाऱ्यांना सामाजिक आणि सांस्कृतिक कार्यक्रमांना उपस्थित राहण्याची परवानगी असली, तरी 'पोलीस नियमावलीनुसार' सार्वजनिक ठिकाणी पोलिसांची नावे किंवा छायाचित्रे असलेले जाहिरात फलक लावण्यास सक्त मनाई आहे. असे असतानाही या नियमाचे शहरात उघडपणे उल्लंघन होत आहे. काही वर्षांपूर्वी एका 'एन्काउंटर स्पेशालिस्ट' अधिकाऱ्याची नियुक्ती झाल्यावर एका कुख्यात गुन्हेगाराने त्यांच्या अभिनंदनाचा फ्लेक्स लावला होता; जो नंतर तत्काळ हटवण्यात आला होता. मात्र, आता व्यावसायिक फायद्यासाठी पोलिसांच्या नावाचा वापर होत असतानाही पालिका प्रशासन आणि पोलीस यंत्रणा सुस्त असल्याची टीका होत आहे.

जबाबदारांवर कायदेशीर कारवाई करणार : महापालिका

या गंभीर प्रकरणाबाबत 'सीविक मिरर'शी बोलताना पुणे महापालिकेच्या आकाशचिन्ह विभागाचे उपायुक्त संदीप कदम म्हणाले, "हा अत्यंत गंभीर प्रकार आहे. बेकायदा फ्लेक्सवर तत्काळ कारवाई करण्याचे निर्देश संबंधित सहाय्यक आयुक्तांना देण्यात आले आहेत. तसेच, पोलीस अधिकाऱ्यांची नावे आणि फोटो वापरून अनधिकृत फ्लेक्स लावणाऱ्या जबाबदार व्यक्तींवर कायदेशीर कारवाई केली जाईल."

Pune : पुणे जिल्ह्यात ८ तालुक्यांतील ८५ टक्के पिकांचे पंचनामे पूर्ण…

पोलीस अधिकाऱ्यांची नावे आणि छायाचित्रांचा जाहिरातींसाठी वापर

सध्या पोलीस अधिकारी आणि कर्मचाऱ्यांची नावे तसेच छायाचित्रे वापरून जाहिराती करण्याचे प्रकार वाढत आहेत. मात्र, या प्रकाराकडे पुरेसे गांभीर्याने पाहिले जात नसल्याचे दिसून येते. पोलीस अधिकाऱ्यांना सामाजिक आणि सांस्कृतिक कार्यक्रमांमध्ये सहभागी होण्याची परवानगी असते. परंतु, पोलीस नियमावलीनुसार पोलीस अधिकारी किंवा कर्मचाऱ्यांची नावे आणि छायाचित्रे असलेले जाहिरात फलक सार्वजनिक ठिकाणी लावता येत नाहीत. असे असतानाही या नियमाचे वारंवार उल्लंघन केले जात आहे.