Rajinikanth Bus Conductor ID Card: रजनीकांत (Rajinikanth) हे दाक्षिणात्य मनोरंजनसृष्टीतील लोकप्रिय अभिनेते आहे. मराठी कुटुंबात जन्माला आलेल्या रजनीकांत यांना साऊथमध्ये देवाचा दर्जा दिला जातो.

जगभरात त्यांचा मोठा चाहतावर्ग आहे. रजनीकांत यांनी आपल्या करिअरमध्ये एका पेक्षा एक सिनेमांत काम केलं आहे. अभिनयक्षेत्रात येण्याआधी रजनीकांत यांनी कंडक्टर म्हणून काम केलं आहे. त्यावेळचे १९७१ सालचे त्यांचे अधिकृत ओळखपत्र (ID Card) समोर आले असून, ते पाहून त्यांचे चाहते अवाक झाले आहेत.

भारतातील सर्वात मोठ्या स्टार्सपैकी एक बनण्याच्या खूप आधी, रजनीकांत हे 'शिवाजीराव गायकवाड' म्हणून ओळखले जात होते. व्हायरल झालेल्या या जुन्या ओळखपत्रावर त्यांचे हेच मूळ नाव 'शिवाजीराव गायकवाड' असे लिहिलेले आहे. या कार्डवर त्यांचा कंडक्टर बॅज क्रमांक आणि कामाचा संपूर्ण तपशील स्पष्ट दिसत आहे. या दुर्मिळ दस्तऐवजानुसार, १९७० च्या दशकाच्या सुरुवातीला ते बंगळुरू परिवहन सेवेच्या (BTS) मार्ग क्रमांक १०अ (Route No. 10A) वर कंडक्टर म्हणून कार्यरत होते. प्रसिद्धी आणि यशाच्या शिखरावर पोहोचण्यापूर्वी रजनीकांत यांचे आयुष्य किती साधे होते, याची झलक या कार्डमधून पाहायला मिळते.