अशोक खरात प्रकरणावर येणाऱ्या सिनेमात अभिनेत्री दिपाली सय्यद रुपाली चाकणकरांची भूमिका साकारणार आहेत. मात्र आता त्यांना ही भूमिका न करण्यासाठी राजकीय दबावाला सामोरं जावं लागत आहे. "ही भूमिका करू नका. नाहीतर तुमचं राजकीय करिअर उद्ध्वस्त करू", अशी धमकी महिला नेत्याने दिल्याचा धक्कादायक खुलासा दिपाली सय्यद यांनी केला आहे.

एबीपी माझाशी संवाद साधताना दिपाली सय्यद म्हणाल्या, "रुपाली चाकणकरांच्या भूमिकेसाठी मला विचारणा झाली. मी चार महिने बिग बॉसच्या घरात होते. त्यामुळे अशोक खरात हे काय प्रकरण आहे हेच मला माहीत नव्हतं. बिग बॉसच्या घरातून बाहेर आल्यावर याबाबत कळलं. या प्रकरणात अनेक मोठ्या लोकांची नावंही समोर आली आहेत. श्रद्धा आणि अंधश्रद्धा यात एक धूसर रेष असते ती ओळखता आली पाहिजे. शिवाय जे काही घडलं आहे ते लोकांना समजलं पाहिजे. मला रोलसाठी विचारणा करण्यात आली आहे. मी होकार दिला तर पुढच्या महिन्यापासून शुटिंग सुरु होईल कारण ऑक्टोबरमध्ये सिनेमा रिलिज होणार आहे".