दरम्यान, आता समोर आलेल्या नव्या व्हिडीओमध्ये एक विक्रेता समोश्यांच्या ट्रेवर पाय ठेवून बसलेला दिसत आहे. हा प्रकार चालत्या ट्रेनमधील असल्याचे सांगितले जात असून, समोश्यांवर थेट धूळ आणि घाण पडत असल्याचे व्हिडीओमध्ये स्पष्टपणे दिसते. विशेष म्हणजे हेच समोसे नंतर प्रवाशांना विकले जाणार असल्याने संताप व्यक्त केला जात आहे.

हा व्हिडीओ indiadailynow या इन्स्टाग्राम पेजवरून शेअर करण्यात आला आहे. या व्हिडीओमध्ये तुम्ही पाहू शकता, ट्रेनमधील विक्रेता टॉयलेटजवळ वॉश बेसिनखाली बसला आहे. त्यानं आपले पाय समोस्यांनी भरलेल्या बॉक्सवर ठेवले आहेत आणि तो शांतपणे फोनवर कोणाशी तरी बोलत आहे. लक्षवेधी बाब म्हणजे ट्रेनमधील फ्लोअरिंगवर किती धूळ असते, हे वेगळं सांगायची गरज नाही. ती धूळ त्या विक्रेत्याच्या पायामार्फत समोस्यांवर पडत आहे आणि तेच समोसे खाऊन पुढे लोक आजारी पडू शकतात. हा व्हिडीओ पाहून नेटकरी भयंकर संतापले आहेत आणि या विक्रेत्यावर कारवाई करण्याची मागणी केली जात आहे.

ही घटना नेमकी कुठे घडली, याबाबत कुठलीही अधिकृत माहिती समोर आलेली नाही. मात्र, विक्रेत्याचा शर्ट फिकट निळ्या रंगाचा दिसत आहे आणि रेल्वे प्रशासनाचे अधिकृत विक्रेतेदेखील साधारण अशाच प्रकारचे कपडे घालतात. त्यामुळे हा विक्रेता अधिकृत असण्याची शक्यता व्यक्त केली जात आहे.

हा व्हिडीओ आतापर्यंत १० हजारांहून अधिक वेळा पाहिला गेला आहे. व्हिडीओ पाहून जवळपास सर्वच नेटकरी संतापले असून, अशा बेशिस्त विक्रेत्यांवर कठोर कारवाई करण्याची मागणी होत आहे. तर काही जण ट्रेनमध्ये अन्नपदार्थ खरेदी करू नका, असा सल्लाही देत आहेत.