मात्र, या गोळ्यांचा जास्त वापर केल्यास आरोग्यावर विपरीत परिणाम होऊ शकतो. त्यामुळे शक्यतो घरगुती उपायांचा अवलंब करून डोकेदुखी कमी करण्याचा प्रयत्न करणे अधिक फायदेशीर ठरते.

डोकेदुखीची अनेक कारणे असू शकतात. अपुरी झोप, ताणतणाव, सायनस, पचनाचे त्रास किंवा शरीरातील पाण्याची कमतरता यामुळे डोकेदुखी उद्भवते. त्यामुळे प्रथम कारण ओळखणे आणि त्यावर उपाय करणे गरजेचे आहे.

डोकेदुखी टाळण्यासाठी सर्वात सोपा उपाय म्हणजे पुरेसे पाणी पिणे. शरीरात पाण्याची कमतरता असल्यास डोकेदुखी वाढू शकते. त्यामुळे दिवसातून थोड्या थोड्या वेळाने पाणी पिणे आवश्यक आहे. नुसते पाणी प्यायला आवडत नसेल तर इलेक्ट्रोलाइट्स असलेले पेयही घेता येते.

कपाळावर आईस पॅक लावल्यानेही डोकेदुखी कमी होण्यास मदत होते. बर्फामुळे रक्तवाहिन्यांतील प्रवाह सुधारतो आणि वेदना कमी होतात. त्याचप्रमाणे, मानेला गरम पाण्याचा शेक दिल्यास स्नायू सैल होतात आणि ताणतणावामुळे होणारी डोकेदुखी कमी होते.

गरम पाण्यात हात किंवा पाय काही वेळ बुडवून ठेवणे हा देखील एक सोपा उपाय आहे. यामुळे शरीरातील रक्तप्रवाह सुधारतो आणि डोकेदुखी कमी होण्यास मदत होते. तसेच, गरम पाण्यात लिंबाचा रस घेणे पचन सुधारते आणि गॅसमुळे होणारी डोकेदुखी कमी करते.

सफरचंद आणि सफरचंदाच्या रसापासून तयार केलेले व्हिनेगरही उपयुक्त ठरते. यामुळे शरीरातील आम्ल आणि क्षार यांचा समतोल राखला जातो. काही लोकांना हिरव्या सफरचंदाचा वास घेतल्यानेही आराम मिळतो.

पेपरमिंट आणि आले हेही डोकेदुखीवर प्रभावी उपाय आहेत. पेपरमिंट चहा किंवा त्याचे तेल कपाळावर लावल्याने वेदना कमी होतात. आल्याचा चहा पिण्याने रक्तवाहिन्या सैल होतात आणि वेदना कमी होतात. तसेच पचन सुधारण्यासही मदत होते.

निलगिरी तेल, दालचिनी आणि नागवेलची पाने हे देखील डोकेदुखीवर उपयोगी ठरतात. या घटकांपासून तयार केलेले लेप कपाळावर लावल्यास वेदना कमी होतात.

तज्ज्ञांच्या मते, डोकेदुखी सुरू होताच वेदनाशामक गोळ्या घेण्याऐवजी असे घरगुती उपाय करून पाहावेत. यामुळे कोणतेही दुष्परिणाम होत नाहीत. मात्र, सतत डोकेदुखी होत असल्यास किंवा घरगुती उपायांनी आराम मिळत नसेल तर त्वरित डॉक्टरांचा सल्ला घ्यावा.