India-Italy Partnership: पंतप्रधान नरेंद्र मोदी (PM Narendra Modi) यांचा इटली दौरा यशस्वीरित्या संपन्न झाला असून, भारत आणि इटली मधील द्विपक्षीय संबंधांना नवी चालना मिळाली आहे.

दोन्ही देशांमधील भागीदारी भविष्यात नव्या उंचीवर नेण्याचा निर्णय आजच्या भेटीदरम्यान घेण्यात आला.

पंतप्रधान Narendra Modi आणि इटलीच्या पंतप्रधान Giorgia Meloni यांच्या रोममधील बैठकीनंतर दोन्ही देशांनी 'स्पेशल स्ट्रॅटेजिक पार्टनरशिप' (Special Strategic Partnership) अधिक मजबूत करण्याचा निर्धार व्यक्त केला. संरक्षण, व्यापार, तंत्रज्ञान, ऊर्जा, समुद्री सुरक्षा आणि कनेक्टिव्हिटी या क्षेत्रांमध्ये सहकार्य वाढवण्यावर या बैठकीमध्ये विशेष भर देण्यात आला.

उपलब्ध माहितीनुसार, दोन्ही देशांनी 2029 पर्यंत, द्विपक्षीय व्यापार 20 अब्ज युरोपर्यंत नेण्याचे महत्त्वाकांक्षी लक्ष्य ठेवले आहे. सध्या भारत-इटली व्यापार सुमारे 14 अब्ज युरोंच्या आसपास असल्याचे सांगितले जाते. उत्पादन, ऑटोमोबाईल, संरक्षण उपकरणे, हरित ऊर्जा, कृत्रिम बुद्धिमत्ता आणि डिजिटल तंत्रज्ञान या क्षेत्रांमध्ये मोठ्या गुंतवणुकीच्या संधी निर्माण होण्याची शक्यता व्यक्त केली जात आहे.

: PM Modi melody: पंतप्रधानांनी मेलोडी भेट देताच 'पार्ले'चे शेअर्स वधारले; किती टक्क्यांनी झाली वाढ?

IMEC प्रकल्पावर चर्चा

या भेटीत 'इंडिया-मिडल ईस्ट-युरोप इकॉनॉमिक कॉरिडॉर' (IMEC) प्रकल्पावरही महत्त्वाची चर्चा झाली. भारतातून मध्यपूर्वमार्गे युरोपपर्यंत व्यापार आणि वाहतूक सुलभ करण्यासाठी हा कॉरिडॉर महत्त्वाचा मानला जातो. चीनच्या 'बेल्ट अँड रोड' प्रकल्पाला पर्याय म्हणूनही या प्रकल्पाकडे पाहिले जात आहे.

मोदी आणि मेलोनी यांनी संरक्षण सहकार्य वाढवणे, समुद्री सुरक्षेवर संयुक्त काम करणे, तसेच इंडो-पॅसिफिक आणि भूमध्य समुद्र क्षेत्रात धोरणात्मक समन्वय वाढवण्यावर भर दिला. याशिवाय कृषी, उच्च शिक्षण, क्रिटिकल मिनरल्स, म्युझियम को-ऑपरेशन आणि आर्थिक गुन्ह्यांविरोधातील कारवाईसाठी अनेक करारांवरही सहमती झाली.