Jalna Protest : जालना शहरातील गांधी चमन परिसर सध्या ब्राह्मण समाजाच्या विविध मागण्यांसाठी सुरू असलेल्या आंदोलनाचे केंद्र बनले आहे. आपल्या मागण्यांकडे शासनाचे लक्ष वेधण्यासाठी सकल ब्राह्मण समाजाच्या (Sakal Brahmin Samaj) वतीने आमरण उपोषण सुरू करण्यात आले असून, आंदोलनाचा चौथा दिवस उजाडला आहे.
ब्राह्मण समाजातील आर्थिकदृष्ट्या गरजू विद्यार्थ्यांना शिक्षण घेताना अडचणींचा सामना करावा लागू नये, यासाठी मुला-मुलींना मोफत शिक्षणाची सुविधा उपलब्ध करून द्यावी, अशी प्रमुख मागणी आंदोलकांकडून करण्यात येत आहे. त्याचबरोबर विद्यार्थ्यांसाठी स्वतंत्र वसतिगृहांची व्यवस्था करण्यात यावी, अशीही मागणी पुढे करण्यात आली आहे.
शिक्षण, रोजगार आणि सामाजिक सुविधांशी संबंधित विविध प्रश्नांकडे सरकारने गांभीर्याने पाहावे, अशी भूमिका आंदोलनकर्त्यांनी घेतली आहे. मागण्या केवळ कागदोपत्री न राहता त्यावर ठोस निर्णय घेण्यात यावा, अशी अपेक्षा सकल ब्राह्मण समाजाकडून व्यक्त केली जात आहे.
दरम्यान, आंदोलन सुरू होऊन चार दिवसांचा कालावधी उलटत असतानाही शासनाच्या भूमिकेकडे सर्वांचे लक्ष लागले आहे. उपोषणकर्त्यांच्या मागण्यांवर प्रशासनाकडून काय भूमिका घेतली जाते आणि आंदोलनाची पुढील दिशा काय असेल, याबाबत उत्सुकता निर्माण झाली आहे.
ब्राह्मण समाजाच्या विविध मागण्यांसाठी दीपक रणनवरे (Deepak Rannavare) हे जालना शहरातील गांधी चमन परिसरात आमरण उपोषणाला बसले असून, आज त्यांच्या उपोषणाचा चौथा दिवस आहे. मोफत शिक्षण, स्वतंत्र वसतिगृहांसह इतर मागण्या मान्य करण्यासाठी शासनाने तातडीने सकारात्मक निर्णय घ्यावा, अशी मागणी आंदोलनकर्त्यांकडून करण्यात येत आहे.
हेही पहा –