उत्तर आफ्रिकेतील मोरक्को देशाच्या सीमेला लागून असलेल्या स्पेनच्या 'सेउटा' (Ceuta) या स्वायत्त शहराच्या सीमेवर बेकायदेशीर स्थलांतरितांनी अचानक मोठा हल्ला चढवला. हजारो नागरिकांनी एकत्र येत सीमा सुरक्षा कठडे तोडून स्पेनमध्ये अनधिकृतपणे प्रवेश मिळवला.
या अचानक झालेल्या प्रचंड गर्दीमुळे आणि चेंगराचेंगरीत किमान १८ जणांचा मृत्यू झाला असून अनेक मृतदेह समुद्राच्या पाण्यात तरंगताना आढळून आले आहेत. या अत्यंत गंभीर आणि अनियंत्रित परिस्थितीवर मात करण्यासाठी स्पेन सरकारने तातडीने पावले उचलत वादग्रस्त भागात सशस्त्र लष्करी तुकड्या तैनात करण्याचा मोठा निर्णय घेतला आहे. (Spain Border Crisis)
स्थानिक सूत्रांनी दिलेल्या माहितीनुसार, सीमेवरील कुंपण (Border Fencing) अचानक खुली झाल्यामुळे मोरक्कोमधील तरुण, महिला आणि लहान मुलांसह हजारो नागरिकांनी समुद्रातून पोहत आणि धावत स्पेनच्या भूमीवर येण्यास सुरुवात केली. यामुळे स्थानिक प्रशासनाची सुरक्षा यंत्रणा पूर्णपणे कोलमडली असून शहरात आणीबाणी घोषित करण्याची मागणी स्थानिक नेत्यांनी केली आहे. स्पेनचे पंतप्रधान पेड्रो सांचेझ आणि अंतर्गत व्यवहार मंत्री परिस्थितीची प्रत्यक्ष पाहणी करण्यासाठी या भागाचा दौरा करणार आहेत. या आंतरराष्ट्रीय घडामोडींनंतर शेजारील इटली देशानेही चिंता व्यक्त केली असून, सीमा सुरक्षेसाठी शेंगेन करार (Schengen Agreement) तात्पुरता निलंबित करण्याचा इशारा दिला आहे. (Spain Border Crisis)
सर्वोच्च न्यायालयाच्या निर्णयाचा परिणाम कायदेतज्ज्ञांच्या मते, स्पेनच्या सर्वोच्च न्यायालयाने अलीकडेच दिलेल्या एका निकालाचा गैरफायदा मानवी तस्करी करणाऱ्या टोळ्यांनी घेतला आहे. या नवीन नियमानुसार, समुद्राच्या मार्गाने येणाऱ्या स्थलांतरितांना आवश्यक कायदेशीर प्रक्रियेशिवाय तातडीने देशाबाहेर हाकलून देता येत नाही. या शिथिलतेमुळेच स्थलांतरितांचे धाडस वाढले असून सीमेवर अभूतपूर्व गर्दी झाली आहे. सध्या स्पेनच्या केंद्रीय प्रशासनाने राष्ट्रीय आणीबाणी लागू करण्याची स्थानिक मागणी फेटाळून लावली असली, तरी संपूर्ण सीमा सील करून घुसखोरांना तात्काळ परत पाठवण्याची कायदेशीर कारवाई वेगाने सुरू केली आहे.
हेही पहा –