मुंबई, 05 मे (हिं.स.)।मुंबई इंडियन्स ने लखनऊ सुपर जायंट्स विरुद्ध सहा विकेट्सने शानदार विजय मिळवला. रोहित शर्मा आणि रेयान रिकेल्टन यांच्या दमदार भागीदारीच्या जोरावर मुंबईने 229 धावांचे लक्ष्य 18.4 षटकांत 4 गडी गमावून पूर्ण केले.

यापूर्वी लखनऊने 20 षटकांत 5 बाद 228 धावा केल्या होत्या. हा विजय आयपीएलमध्ये मुंबई इंडियन्सचा सर्वात मोठा रन चेस ठरला आहे. याआधी त्यांनी याच हंगामात कोलकाता नाईट रायडर्स विरुद्ध 221 धावांचे लक्ष्य गाठले होते. सलग तीन पराभवानंतर मुंबईला हा विजय मिळाला असला तरी ते गुणतालिकेत नवव्या स्थानावर आहेत.

लक्ष्याचा पाठलाग करताना रोहित आणि रिकेल्टन यांनी मुंबईला शानदार सुरुवात करून दिली. रोहित इम्पॅक्ट प्लेयर म्हणून मैदानात उतरले होते आणि त्यांनी 44 चेंडूंमध्ये 6 चौकार व 7 षटकारांच्या मदतीने 84 धावा केल्या. रिकेल्टनने 32 चेंडूंमध्ये 6 चौकार आणि 8 षटकारांसह 83 धावा केल्या. या दोघांमध्ये पहिल्या विकेटसाठी 143 धावांची भागीदारी झाली. मात्र यांच्याशिवाय इतर फलंदाजांना मोठी खेळी करता आली नाही. सूर्यकुमार यादव (12) आणि तिलक वर्मा (11) स्वस्तात बाद झाले. नमन धीर 23 धावांवर नाबाद राहिला, तर विल जॅक्स 10 धावांवर नाबाद परतला. लखनऊकडून मणिमरन सिद्धार्थ यांनी 2 बळी घेतले, तर मोहम्मद शमी आणि मोहसिन खान यांनी प्रत्येकी एक विकेट घेतली.

याआधी मुंबईने नाणेफेक जिंकून प्रथम गोलंदाजीचा निर्णय घेतला. लखनऊची सुरुवात चांगली झाली असली तरी तिसऱ्याच षटकात जोस इंग्लिस (13) बाद झाला. त्यानंतर मिचेल मार्श आणि निकोलस पूरन यांनी जोरदार फलंदाजी केली. पूरनने फक्त 16 चेंडूंमध्ये अर्धशतक पूर्ण करताना दीपक चाहर यांच्या गोलंदाजीवर षटकार मारला. पूरन आणि मार्श यांनी दुसऱ्या विकेटसाठी 94 धावांची भागीदारी करत संघाला भक्कम पाया दिला. मात्र कॉर्बिन बॉश यांनी एका षटकात पूरन (63) आणि मार्श (44) या दोघांना बाद करून लखनऊला मोठा धक्का दिला.

पूरनने 21 चेंडूंमध्ये 1 चौकार आणि 8 षटकारांच्या मदतीने 63 धावा केल्या, तर मार्शने 25 चेंडूंमध्ये 44 धावा केल्या. कर्णधार ऋषभ पंत यांची खराब कामगिरी कायम राहिली आणि ते 15 धावांवर बाद झाले. हिम्मत सिंह 40 धावांवर नाबाद राहिला, तर एडेन मार्करम 31 धावांवर नाबाद परतला. मुंबईकडून कॉर्बिन बॉश यांनी 2 विकेट घेतल्या, तर एमएम गजनफर, विल जॅक्स आणि रघु शर्मा यांनी प्रत्येकी एक बळी घेतला.