अमरावती येथील जिल्हा स्त्री रुग्णालयातील (डफरीन)बालके मृत्यूच्या घटनेची अतिशय गंभीर दखल महसूल मंत्री व पालकमंत्री चंद्रशेखर बावनकुळे घेतली, ही घटना २४ ऑगस्ट रोजी पहाटे ३.३० वाजता घडल्यानंतर सकाळी चारवाजेपासून संबंधित सर्व यंत्रणांशी संपर्क साधून आवश्यक निर्देश दिले.

या दुर्दैवी घटनेत ३ नवजात बालकांचा मृत्यू झाला. मृत बालकांच्या कुटुंबीयांना प्रत्येकी रु. ५ लक्ष मदत जाहीर करण्यात आली. पालकमंत्री बावनकुळे यांच्या सुचनेनुसार एकूण ३६ नवजात बालकांना सुरक्षिततेच्या दृष्टीने इतर रुग्णालयांमध्ये उपचारासाठी हलविण्यात आले. त्यापैकी २९ नवजात बालकांना पुढीलप्रमाणे विविध रुग्णालयांमध्ये दाखल करण्यात आले. डॉ. पंजाबराव देशमुख वैद्यकीय महाविद्यालय व रुग्णालय, अमरावती ११,डॉ.मुरके रुग्णालय, अमरावती ८, होप रुग्णालय, अमरावती ८,पारिजात रुग्णालय दोन अशा २९ नवजात बालकांवर विनामूल्य उपचार करण्याबाबत निर्देश दिले असुन त्यांचा मोफत उचार सुरु आहे. तसेच ७ नवजात बालके त्यांच्या मातांसोबत जिल्हा स्त्री रुग्णालयात वैद्यकीय देखरेखीखाली सुरक्षित आहेत.

मुख्यमंत्री देवेंद्र फडणवीस यांनी आरोग्यमंत्री व आरोग्य सचिवाना तातडीने घटनास्थळी पाहणी करण्यासाठी पाठविले होते. त्यांनी दुपारी १.३० वाजता घटनास्थळाची पाहणी केल्यानंतर आरोग्य आयुक्तांच्या अध्यक्षतेखाली दहा सदस्यीय समिती गठित करण्यात आली असून, सात दिवसांच्या आत समितीने वस्तुस्थितीदर्शक अहवाल सादर करण्याचे निर्देश देण्यात आले आहेत.

---------------

हिंदुस्थान समाचार / सुधांशू जोशी