Sunday, 18 Apr, 8.23 pm Hindusthan Samachar

मुख्य बातमी
अन्यायाचा वेळीच प्रतिकार करा, शासन महिला भगिनींच्या खंबीरपणे पाठीशी - यशोमती ठाकूर

पालकमंत्री ठाकूर यांचा मेळघाटातील दुर्गम गावांत दौरा

मेळघाटातील महिला वनकर्मचा-यांशी संवाद


अमरावती , १८ एप्रिल (हिं.स.) : महिला कर्मचा-यांनी कुठल्याही प्रकारचा छळ, अन्याय मुळीच सहन करता कामा नये. अन्यायाचा वेळीच प्रतिकार केला पाहिजे. कुठेही अपप्रकार होत असल्यास वेळीच तक्रार द्यावी. शासन महिलाभगिनींच्या खंबीरपणे पाठीशी उभे आहे, असा विश्वास महिला व बालविकास मंत्री ॲड. यशोमती ठाकूर यांनी दिला. आज श्रीमती ठाकूर यांनी मेळघाटातील महिला वनकर्मचाऱ्यांशी संवाद साधला, त्यावेळी त्या बोलत होत्या.

मेळघाटातील महिला वनकर्मचा-यांना काम करताना येणाऱ्या अडचणी, वरिष्ठांकडून होणारा जाच याबाबत प्राप्त तक्रारींची दखल घेऊन पालकमंत्र्यांनी मेळघाटातील दुर्गम भागातील विविध ठिकाणी दोन दिवस दौरा केला व महिला वनकर्मचा-यांशी थेट संवाद साधून त्यांच्या अडचणी जाणून घेतल्या व त्यांचे मनोबल वाढविले. यावेळी प्रकल्प अधिकारी मिताली सेठी, उपवनसंरक्षक अविनाशकुमार, नवलकिशोर रेड्डी, पीयुषा जगताप उपस्थित होते.

महिला व बालविकास मंत्र्यांनी धारणी तालुक्यातील मांगीया, हरिसाल, बोरी, लवादा, चित्री, चिखलदरा तालुक्यातील जैतादेही, मोथा, आमझरी, शहापूर या गावांबरोबरच अकोट वन्यजीव परिक्षेत्रातील धारगड येथेही भेट दिली.

महिला वन कर्मचा-यांशी संवाद

महिला व बालविकास मंत्री श्रीमती ठाकूर म्हणाल्या की, महाराष्ट्रात महिलाभगिनी अनेक क्षेत्रांत आघाडीने कार्यरत आहेत. अशा ठिकाणी त्यांना काम करताना संरक्षक वातावरण निर्माण होणे गरजेचे आहे. महिला वनकर्मचा-यांशी बोलताना अवमानजनक भाषेचा वापर होणे, त्यांना योग्य मार्गदर्शन करण्याऐवजी 'कारणे दाखवा' नोटीस बजावणे, त्यांना आपले म्हणणे मांडण्याची संधी न देणे, कॅम्पवर स्वतंत्र स्वच्छतागृह नसणे, मानसिक छळ, विशेष व्याघ्र संरक्षक दलातील वनकर्मचा-यांचे पगार वेळेत न होणे अशा गंभीर तक्रारी या भगिनींकडून होत आहेत. वन प्रशासनाने त्यांची तत्काळ दखल घेऊन तक्रारींचे निराकरण करावे, असे निर्देश त्यांनी यावेळी दिले.

विशाखा समितीचे कार्य योग्यरीत्या चालवा

महिलांच्या तक्रारींचे निराकरण करण्यासाठी महिला तक्रार निवारण समितीचे कार्य योग्यरीत्या चालणे आवश्यक आहे. प्रत्येक तक्रारीची वेळीच दखल घ्यावी. महिला वनकर्मचा-यांना आपले म्हणणे मांडण्यासाठी संधी द्यावी व त्यासाठी त्यांना परवानगीची गरज पडू नये, असे निर्देश त्यांनी वनाधिका-यांना दिले.

महिला वनकर्मचा-यांचे मनोबल उंचावण्यासाठी मेडिटेशन कॅम्प घेण्याचीही सूचना त्यांनी केली.

अडचण असल्यास थेट माझ्याशी संपर्क साधा

महिला वनकर्मचा-यांना कुठलीही अडचण असल्यास थेट माझ्याशी संपर्क साधावा. माझ्या फेसबुक पेजवर मोबाईल नंबर जाहीर केला आहे. मला व्हाटसॲपवर संदेशही पाठवता येईल. निर्भिडपणे आपली समस्या मांडा. अन्यायाचा वेळीच प्रतिकार करा, असा संवाद त्यांनी महिलाभगिनींशी साधला.

मागण्यांबाबत मुख्यमंत्र्यांकडे पाठपुरावा करणार

विशेष व्याघ्र संरक्षण दलातील कर्मचा-यांना वेळेवर पगार मिळावा, बालसंगोपन रजा केंद्राप्रमाणे महिला वनकर्मचा-यांनाही मिळावी व इतरही समस्यांसंदर्भात मुख्यमंत्री उद्धव ठाकरे यांच्याकडे पाठपुरावा करण्यात येईल, असेही त्यांनी यावेळी सांगितले.


हिंदुस्थान समाचार

Dailyhunt
Disclaimer: This story is auto-aggregated by a computer program and has not been created or edited by Dailyhunt. Publisher: Hindusthan Samachar Marathi
Top