तसलीमा नसरीन यांनी आरोप केला की, मुक्त विचारवंतांना लक्ष्य केले जात आहे, मानवाधिकारांचे उल्लंघन होत आहे आणि धार्मिक अल्पसंख्याकांवर अन्याय केला जात आहे. मात्र, त्यांनी आशा व्यक्त केली की ही परिस्थिती कायम राहणार नाही आणि एक दिवस बांगलादेशात बदल घडेल.

१९९४ मध्ये झालेल्या आपल्या बांगलादेशातून निर्वासनाचा उल्लेख करताना तसलीमा यांनी हा देशाच्या नैतिक अपयशाचा इतिहास असल्याचे म्हटले. त्यांनी सांगितले की, त्यांनी कोणताही गुन्हा केला नव्हता; उलट आपल्या लेखनातून समान अधिकारांची बाजू मांडली होती. त्यांच्या मते, कट्टरतावाद्यांपासून संरक्षण देण्याची जबाबदारी असलेल्या सरकारनेच त्यांच्याविरोधात एफआयआर दाखल करून त्यांना देश सोडण्यास भाग पाडले.

आपल्या भाषणात त्यांनी २००६ मध्ये तत्कालीन डाव्या आघाडीच्या सरकारच्या काळात कोलकात्यातून झालेल्या निर्वासनाचाही उल्लेख केला. या घटनेबाबत त्यांनी नाराजी व्यक्त करत डाव्या विचारसरणीतील काही लोकांवर टीका केली.

तसलीमा यांनी म्हटले की, मुस्लिम समाजाला अंधारात ठेवण्यासाठी कट्टरपंथीयांसोबत डाव्या विचारसरणीतील काही घटकही जबाबदार आहेत. मात्र, त्यांची लढाई कोणत्याही व्यक्तीविरोधात नसून चुकीच्या विचारसरणींविरोधात असल्याचे त्यांनी स्पष्ट केले.

या कार्यक्रमाला पश्चिम बंगालचे मुख्यमंत्री शुभेंदू अधिकारी उपस्थित होते. यावेळी तसलीमा नसरीन यांचा नागरिक सत्कार करण्यात आला.

दरम्यान, कार्यक्रमात काही काळ तणावाचे वातावरण निर्माण झाले, जेव्हा तसलीमा यांनी ज्येष्ठ कवी जय गोस्वामी यांना मंचावर येण्यासाठी आमंत्रित केले. जय गोस्वामी मंचाकडे जात असताना प्रेक्षकांमधील एका गटाने विरोध केला. परिस्थिती पाहून जय गोस्वामी पुन्हा आपल्या जागेवर परतले.तसलीमा यांच्या दीर्घ निर्वासनाच्या काळात जय गोस्वामी यांनी घेतलेल्या मौन भूमिकेबाबत आणि माजी मुख्यमंत्री ममता बॅनर्जी यांच्याशी असलेल्या जवळिकीबाबत काही विरोधकांमध्ये नाराजी असल्याचे सांगण्यात आले.------------------------

हिंदुस्थान समाचार / मनीष कुलकर्णी