या अभियानाला पाठिंबा दर्शवत माजी मंत्री तथा राज्यसभा खासदार डॉ. अनिल बोंडे यांनी नागरिकांनी हलाल प्रमाणित उत्पादनांवर बहिष्कार टाकावा आणि दिवाळीच्या खरेदीसाठी स्थानिक व्यावसायिकांना प्राधान्य द्यावे, असे आवाहन केले.

डॉ. बोंडे म्हणाले की, दिवाळी हा लक्ष्मीपूजनाचा सण असल्याने यंदा हलालमुक्त दिवाळी साजरी करण्याचा संकल्प नागरिकांनी करावा. हिंदू राष्ट्र समन्वय समितीच्या वतीने त्यांनी आणि सुनील धनवट यांनी नागरिकांना या अभियानात सहभागी होण्याचे आवाहन केले आहे.

हलाल प्रमाणपत्राची पद्धत पूर्वी प्रामुख्याने मांसाहारी पदार्थांपुरती मर्यादित होती. मात्र, आता शाकाहारी खाद्यपदार्थ, सौंदर्यप्रसाधने, साबण, दिवाळीचा फराळ तसेच बांधकाम क्षेत्रातही हलाल प्रमाणपत्राचा वापर होत असल्याचा दावा डॉ. बोंडे यांनी केला.

हलाल प्रमाणपत्रासाठी आकारण्यात येणाऱ्या शुल्काच्या वापराबाबतही त्यांनी गंभीर आरोप केले. या शुल्कातून जमा होणारा पैसा देशातील अस्थिरता निर्माण करण्यासाठी, दहशतवादी कारवायांमध्ये सहभागी असलेल्या व्यक्तींना कायदेशीर मदत देण्यासाठी तसेच त्यांच्या कुटुंबीयांना आर्थिक सहाय्य करण्यासाठी वापरला जात असल्याचा आरोप त्यांनी केला. जमात-ए-इस्लामी आणि अन्य संस्थांच्या माध्यमातून हा पैसा खर्च केला जात असल्याचाही दावा त्यांनी केला. या आरोपांबाबत स्वतंत्र पुष्टी देणारी माहिती त्यांनी यावेळी सादर केल्याचे नमूद नाही.

स्थानिक व्यावसायिकांकडून खरेदी करण्याचे आवाहन

दिवाळीच्या खरेदीसाठी नागरिकांनी आपल्या परिसरातील मिठाई विक्रेते, महिला बचत गट आणि स्थानिक व्यावसायिकांना प्राधान्य द्यावे, असे आवाहन डॉ. बोंडे यांनी केले. अमरावतीतील चितळे बंधूंचा उल्लेख करत स्थानिक उत्पादनांना प्रोत्साहन देण्याची गरज त्यांनी व्यक्त केली. 'स्थानिक उत्पादनांना प्राधान्य द्या' ही संकल्पना प्रत्यक्षात आणण्याचे आवाहनही त्यांनी केले.

ज्या कंपन्यांनी हलाल प्रमाणपत्र घेतलेले नाही, त्यांच्या उत्पादनांची खरेदी करण्याचे आवाहन करत या अभियानाला नागरिकांचा चांगला प्रतिसाद मिळत असल्याचा दावाही त्यांनी केला.

दिवाळीच्या निमित्ताने हलाल प्रमाणित उत्पादनांवर बहिष्कार टाकून अशा प्रकारचे प्रमाणपत्र देणाऱ्या कंपन्यांना धडा शिकवावा, असे आवाहन डॉ. बोंडे यांनी केले.

------------------------------

हिंदुस्थान समाचार / अरुण जोशी