चालू आर्थिक वर्ष 2026-27 मध्ये दुसऱ्यांदा एकूण वस्तू आणि सेवा कर (जीएसटी) संकलन दोन लाख कोटी रुपयांच्या पुढे गेले आहे. यापूर्वी एप्रिल महिन्यात एकूण जीएसटी संकलन सुमारे 2.43 लाख कोटी रुपये झाले होते, जे आतापर्यंतचे जीएसटी संकलनाचे सर्वकालीन उच्चांकी विक्रम आहे.

वित्त मंत्रालयाने जारी केलेल्या आकडेवारीनुसार, गेल्या वर्षी जुलै महिन्यात एकूण जीएसटी संकलन 1.83 लाख कोटी रुपये होते. त्याचप्रमाणे 2026 मधील जुलैपूर्वीच्या महिन्याचा विचार केला असता, जून 2026 मध्ये एकूण जीएसटी संकलन 1.95 लाख कोटी रुपये होते. अशा प्रकारे जुलै 2026 मध्ये वार्षिक तसेच मासिक या दोन्ही आधारांवर एकूण जीएसटी संकलनात वाढ झाली आहे.

सरकारी आकडेवारीनुसार, जुलै 2026 मध्ये आयातीवरील जीएसटी संकलनात 28.80 टक्क्यांची वाढ होऊन ते 66,511 कोटी रुपयांवर पोहोचले. त्याचप्रमाणे देशांतर्गत व्यवहारांमधून होणाऱ्या जीएसटी संकलनातही 10.10 टक्क्यांची वाढ होऊन ते 1.45 लाख कोटी रुपयांच्या पातळीवर पोहोचले.

वित्त मंत्रालयाने जारी केलेल्या आकडेवारीनुसार, यावर्षी जुलै महिन्यात एकूण जीएसटी संकलन 2,11,205 कोटी रुपये झाले. या महिन्यात केंद्रीय वस्तू आणि सेवा कर (सीजीएसटी) मधून 39,835 कोटी रुपयांचे संकलन झाले. त्याचप्रमाणे राज्य वस्तू आणि सेवा कर (एसजीएसटी) मधून 47,881 कोटी रुपये जमा झाले. तर एकात्मिक वस्तू आणि सेवा कर (आयजीएसटी) मधून 1.23 लाख कोटी रुपयांहून अधिक महसूल जमा झाला. कर परताव्याचा विचार केला असता, जुलै महिन्यात एकूण कर परताव्याची रक्कम 13.10 टक्क्यांनी वाढून 29,968 कोटी रुपये झाली. परताव्याचे समायोजन केल्यानंतर एकूण जीएसटी महसूल 1.81 लाख कोटी रुपयांपेक्षा अधिक राहिला.

---------------

हिंदुस्थान समाचार / Suraj Chaugule