ग्लासगो, ३० जुलै (हिं.स.) दोन वेळचा ऑलिम्पिक पदक विजेता नीरज चोप्रा २०२६ च्या राष्ट्रकुल खेळांमधील पुरुषांच्या भालाफेक स्पर्धेच्या अंतिम फेरीत पात्र ठरला आहे. नीरजसोबतच, भारताचे रोहित यादव आणि यशवीर सिंग यांनीही पात्रता फेरीत उत्कृष्ट कामगिरी करत अंतिम फेरीसाठी पात्रता मिळवली.
पात्रता फेरीत कोणीही ८४ मीटरचा स्वयंचलित पात्रतेचा निकष ओलांडला नाही. परिणामी, अव्वल १२ खेळाडू अंतिम फेरीत पोहोचले. नीरज चोप्राने ७९.६१ मीटरचा सर्वोत्तम भालाफेक करून अंतिम फेरीत आपले स्थान निश्चित केले आणि तो एकूण क्रमवारीत पाचव्या स्थानावर राहिला.
भारताचा रोहित यादव ७८.३७ मीटरच्या भालाफेकीसह नवव्या स्थानावर राहिला आणि यशवीर सिंगने ७८.३६ मीटरच्या भालाफेकीसह अंतिम फेरीत आपले स्थान निश्चित केले. अशाप्रकारे, तिन्ही भारतीय भालाफेकपटूंनी पदक फेरी गाठली असून, देशाच्या आशा अधिक बळकट झाल्या आहेत.
पात्रता फेरीत, श्रीलंकेच्या रुमेश पाथिराजेने ८२.८४ मीटर भालाफेक करून प्रथम क्रमांक पटकावला. ग्रेनेडाचा अँडरसन पीटर्स (८१.२९ मीटर) दुसऱ्या, तर दक्षिण आफ्रिकेचा डाऊ स्मिट (८०.६४ मीटर) तिसऱ्या स्थानी राहिला. इंग्लंडचा बेन ईस्ट (८०.३८ मीटर) चौथ्या, तर नीरज पाचव्या स्थानी राहिला. पाकिस्तानचा अर्शद नदीम ७८.६३ मीटर भालाफेक करून सातव्या स्थानी राहिला आणि अंतिम फेरीसाठी पात्र ठरला.
पुरुषांच्या भालाफेक स्पर्धेचा अंतिम सामना १ ऑगस्ट रोजी खेळला जाईल, जिथे नीरज चोप्रा २०१८ च्या गोल्ड कोस्ट राष्ट्रकुल क्रीडा स्पर्धेतील आपल्या सुवर्णपदकाची पुनरावृत्ती करण्याचा प्रयत्न करेल. या स्पर्धेत भारताला पदकाच्या प्रबळ आशा आहेत, कारण भारताचे तीन खेळाडू अंतिम फेरीत पोहोचले आहेत.
---------------
हिंदुस्थान समाचार / वृषाली देशपांडे