जागतिक आर्थिक दबाव आणि जोरदार विक्रीमुळे सेन्सेक्स आणि निफ्टी सलग चौथ्या व्यवहाराच्या दिवशी घसरणीसह बंद झाले. या घसरणीमुळे गुंतवणूकदारांच्या संपत्तीत तब्बल ७.४२ लाख कोटी रुपयांची घट झाली. दिवसभर बाजारात मोठ्या प्रमाणात चढ-उतार पाहायला मिळाले. दुसऱ्या सत्रात काही समभागांमध्ये खरेदी झाल्याने बाजार सावरण्याचा प्रयत्न झाला; मात्र दोन्ही प्रमुख निर्देशांकांना हिरव्या निशाणावर परतता आले नाही.

शुक्रवारी बाजाराची सुरुवात तेजीने झाली होती. मुंबई शेअर बाजाराचा सेन्सेक्स मागील बंद पातळी ७३,२४९.३९ अंकांच्या तुलनेत ४१६.२५ अंकांच्या वाढीसह ७३,६६५.६४ अंकांवर उघडला. सुरुवातीच्या खरेदीमुळे तो ७३,७६६.५१ अंकांच्या उच्चांकी पातळीवर पोहोचला. मात्र, ही तेजी फार काळ टिकली नाही. काही वेळातच गुंतवणूकदारांनी नफावसुली सुरू केल्याने बाजारात विक्रीचा दबाव वाढला. परिणामी, सेन्सेक्स घसरून ७२,४५२.३७ अंकांच्या नीचांकी पातळीवर पोहोचला. त्यानंतर झालेल्या खरेदीमुळे काही प्रमाणात सुधारणा झाली. अखेर सेन्सेक्स १२५.५६ अंकांच्या म्हणजेच ०.१७ टक्क्यांच्या घसरणीसह ७३,१२३.८३ अंकांवर बंद झाला.

राष्ट्रीय शेअर बाजाराचा निफ्टीही सुरुवातीला तेजीमध्ये होता. मागील बंद पातळी २२,६८७.६५ अंकांच्या तुलनेत ५४.५५ अंकांच्या वाढीसह तो २२,७४२.२० अंकांवर उघडला. सुरुवातीच्या व्यवहारात निफ्टीने २२,७८७.२५ अंकांची उच्चांकी पातळी गाठली. मात्र, विक्रीचा दबाव वाढल्याने निर्देशांक घसरत २२,३७२ अंकांच्या नीचांकी पातळीवर पोहोचला. नंतर झालेल्या खरेदीमुळे बाजाराला काहीसा आधार मिळाला. अखेर निफ्टी ८७.६५ अंकांच्या म्हणजेच ०.३९ टक्क्यांच्या घसरणीसह २२,६०० अंकांवर बंद झाला.

क्षेत्रनिहाय व्यवहारात जवळपास सर्वच क्षेत्रांमध्ये घसरण नोंदवण्यात आली. धातू क्षेत्रातील समभागांना सर्वाधिक फटका बसला. निफ्टी पीएसयू बँक निर्देशांक २.२६ टक्के, निफ्टी बँक १.१६ टक्के, निफ्टी फार्मा १.०४ टक्के आणि निफ्टी फायनान्स सर्व्हिसेस १.०३ टक्क्यांनी घसरले. निफ्टी एफएमसीजीमध्ये ०.९९ टक्के, ऑटोमध्ये ०.६० टक्के आणि आयटी निर्देशांकात ०.२७ टक्क्यांची घसरण झाली. मिडकॅप निर्देशांक २.२१ टक्के, तर स्मॉलकॅप निर्देशांक २.९४ टक्क्यांनी खाली आला.

बाजारातील घसरणीमुळे मुंबई शेअर बाजारात सूचिबद्ध कंपन्यांचे एकूण बाजारमूल्य घटून ४५१.८३ लाख कोटी रुपयांवर आले. गुरुवारी हे मूल्य ४५९.२५ लाख कोटी रुपयांपेक्षा अधिक होते. त्यामुळे एकाच दिवसात गुंतवणूकदारांच्या संपत्तीत ७.४२ लाख कोटी रुपयांची घट झाली.

दिवसभरात राष्ट्रीय शेअर बाजारात व्यवहार झालेल्या ३,२९७ समभागांपैकी २,८६३ समभाग घसरणीसह बंद झाले, तर केवळ ४३४ समभागांनी वाढ नोंदवली. एटरनल, अपोलो हॉस्पिटल्स आणि ओएनजीसी यांच्या समभागांत वाढ झाली. दुसरीकडे, श्रीराम फायनान्स, जेएसडब्ल्यू स्टील, जिओ फायनान्शियल सर्व्हिसेस आणि टाटा स्टील यांच्या समभागांमध्ये मोठी घसरण झाली. डॉलरची मजबुती, कच्च्या तेलाच्या दरातील वाढ आणि जागतिक बाजारातील दबाव यामुळे आगामी व्यवहारांमध्येही गुंतवणूकदारांचे लक्ष बाजाराच्या हालचालींकडे राहणार आहे.

---------------

हिंदुस्थान समाचार / Suraj Chaugule