त्यांनी म्हटले की, अशा संवेदनशील लष्करी तंत्रज्ञानाचे हस्तांतरण कदाचित कधीच होणार नाही.

मेरीलँडमधील कॅम्प डेव्हिड येथे झालेल्या मंत्रिमंडळाच्या बैठकीदरम्यान, पत्रकारांनी ट्रम्प यांना विचारले की, पॅट्रियट क्षेपणास्त्रांच्या निर्मितीचा परवाना मिळण्यापूर्वी युक्रेनचे अध्यक्ष वोलोडिमिर झेलेन्स्की यांना काही अतिरिक्त अटी पूर्ण कराव्या लागतील का.

यावर ट्रम्प यांनी उत्तर दिले, ही शस्त्रे अत्यंत प्रगत आहेत. इतर कोणीही त्यांची निर्मिती करणार नाही याची आम्हाला खूप काळजी घ्यावी लागेल. आम्ही अद्याप याला मंजुरी दिलेली नाही. चर्चा सुरू आहे, पण मला वाटत नाही की असे तंत्रज्ञान दिले जाईल. मला वाटत नाही की हे कधी घडेल.

झेलेन्स्की यांनी या आठवड्याच्या सुरुवातीला वॉशिंग्टन, डी.सी. येथे ट्रम्प यांची भेट घेतली होती. बैठकीनंतर, त्यांनी एका मुलाखतीत दावा केला की, युक्रेनला पॅट्रियट क्षेपणास्त्र प्रणाली तयार करण्याचा परवाना देण्यास ट्रम्प यांनी सहमती दर्शवली आहे.

मात्र, ट्रम्प यांच्या ताज्या वक्तव्यामुळे झेलेन्स्की यांच्या दाव्यावर प्रश्नचिन्ह निर्माण झाले आहे. यापूर्वी प्रसिद्ध झालेल्या एका मुलाखतीत, ट्रम्प यांनी असेही म्हटले होते की, युक्रेनला पॅट्रियट क्षेपणास्त्रे तयार करण्याची परवानगी देण्याबाबत त्यांना पूर्ण विश्वास नाही.

ट्रम्प यांच्या वक्तव्यावरून असे दिसून येते की, अमेरिका आपल्या प्रगत संरक्षण तंत्रज्ञानाच्या हस्तांतरणाबाबत अजूनही अत्यंत सावध आहे आणि या विषयावर कोणताही अंतिम निर्णय झालेला नाही.

---------------

हिंदुस्थान समाचार / वृषाली देशपांडे