नेवासा : श्री. संत किसन महाराज सुडके यांच्या पुण्यतिथीनिमित्त देण्यात येणाऱ्या श्री संत किसन महाराज सुडके राज्यस्तरीय साहित्य पुरस्कार-२०२६ साठी साहित्यिक व प्रकाशकांकडून प्रवेशिका मागविण्यात आल्या आहेत.
या पुरस्कारासाठी कथासंग्रह, कवितासंग्रह, कादंबरी, बालसाहित्य, संतसाहित्य, ललित लेखन, नाटक, चरित्र/आत्मचरित्र, प्रवासवर्णन तसेच वैचारिक व समीक्षणात्मक लेखन अशा एकूण दहा वाङ्मय प्रकारांचा समावेश करण्यात आला आहे. या पुरस्कारासाठी १ जानेवारी २०२५ ते ३० जून २०२६ या कालावधीत प्रकाशित झालेल्या साहित्यकृतींचा विचार करण्यात येणार असून इच्छुक साहित्यिक व प्रकाशकांनी आपल्या साहित्यकृतींच्या दोन प्रती, अल्पपरिचय आणि पासपोर्ट आकाराचे दोन छायाचित्रांसह २५ जुलै २०२६ पर्यंत पाठवाव्यात, असे आवाहन आयोजक संस्थेच्या वतीने करण्यात आले आहे.
प्रत्येक वाङ्मय प्रकारासाठी स्वतंत्र तज्ज्ञ परीक्षकांची नियुक्ती करण्यात येणार असून पारदर्शक पद्धतीने परीक्षण करून पुरस्कारार्थींची निवड केली जाणार आहे. ISBN क्रमांक प्राप्त असलेली पुस्तकेच स्वीकारली जाणार आहेत. पुरस्कार स्वीकारण्यासाठी संबंधित साहित्यिकाची प्रत्यक्ष उपस्थिती आवश्यक राहणार आहे. पुरस्काराचे स्वरूप आकर्षक सन्मानचिन्ह, सन्मानपत्र, शाल व श्रीफळ असे राहणार आहे.
याशिवाय आरोग्यसेवा, नवउद्योजक, उच्च शैक्षणिक गुणवत्ता, पत्रकारिता आणि संगीत क्षेत्रातील विशेष उल्लेखनीय कार्य करणाऱ्या व्यक्तींनाही विशेष पुरस्कार देण्यात येणार आहेत. संबंधित क्षेत्रातील इच्छुकांनी आवश्यक माहिती व प्रस्ताव संस्थेकडे पोस्टाने पाठवावेत.
पुस्तके पाठविण्याचा पत्ता :
अध्यक्ष,
श्रीगुरू बाळकृष्ण महाराज सुडके,
श्री. संत सुडके महाराज आश्रम, संतनगर संस्थान, कांगेणी
ता. नेवासा, जि. अहिल्यानगर - ४१४६०७
संपर्क : ९८२२०९५७७३ / ७२१८५०२०२०