जेएनएन, पुणे: गणेशोत्सवाच्या पार्श्वभूमीवर पुणे जिल्हा प्रशासनाने ध्वनीप्रदूषण आणि लेझर शोबाबत कठोर भूमिका घेतली आहे. गणेशोत्सव मंडळांनी सर्वोच्च न्यायालयाने घालून दिलेल्या ध्वनीप्रदूषणाच्या नियमांचे काटेकोरपणे पालन करावे, अन्यथा संबंधितांवर गुन्हे दाखल केले जातील, असा स्पष्ट इशारा पुण्याच्या जिल्हाधिकाऱ्यांनी दिला आहे.
त्यामुळे यंदाच्या गणेशोत्सवात डीजेचा दणदणाट आणि लेझर शोवर प्रशासनाची करडी नजर राहणार आहे.
गणेशोत्सव हा पुण्याच्या सांस्कृतिक आणि सामाजिक जीवनातील महत्त्वाचा उत्सव आहे. मात्र उत्सवाच्या नावाखाली ध्वनीप्रदूषण वाढू नये, नागरिकांना त्रास होऊ नये आणि न्यायालयाच्या आदेशांचे उल्लंघन होऊ नये, यासाठी प्रशासनाने यंदा विशेष खबरदारी घेण्याचा निर्णय घेतला आहे. डीजेमुक्त गणेशोत्सव साजरा करण्याचा आग्रह सामाजिक कार्यकर्ते विद्यानंद बापट यांनी धरला आहे.
'डीजेचा दणदणाट नको'
गणेशोत्सव मंडळांनी पारंपरिक पद्धतीने आणि शांततेत उत्सव साजरा करावा, असे आवाहन प्रशासनाकडून करण्यात आले आहे.मोठ्या आवाजातील डीजे, साउंड सिस्टीम आणि ध्वनीक्षेपकांमुळे होणाऱ्या ध्वनीप्रदूषणावर नियंत्रण ठेवण्याच्या सूचना देण्यात आले आहेत.
ध्वनीप्रदूषणाच्या नियमांचे उल्लंघन करणाऱ्या मंडळांवर केवळ कारवाईचा इशारा देऊन प्रशासन थांबणार नसून, नियम मोडल्यास गुन्हा दाखल केला जाईल, अशी भूमिका जिल्हाधिकाऱ्यांनी स्पष्ट केली आहे.
लेझर शोवरही बंदी
गणेशोत्सवातील मिरवणुका आणि कार्यक्रमांमध्ये लेझर बीमचा मोठ्या प्रमाणात वापर केला जातो. मात्र यामुळे नागरिकांसह वाहनचालक, पोलिस कर्मचारी तसेच इतरांच्या डोळ्यांना त्रास होण्याची शक्यता असते. त्यामुळे यंदा गणेशोत्सवात लेझरचा वापर करण्यास बंदी घालण्यात आली आहे.
लेझरच्या माध्यमातून होणारे प्रकाशप्रदूषण आणि त्याचे संभाव्य दुष्परिणाम लक्षात घेता मंडळांनी या नियमाचे पालन करावे, अशा सूचना प्रशासनाकडून देण्यात आल्या आहेत.
सर्वोच्च न्यायालयाच्या आदेशाचा संदर्भ
ध्वनीप्रदूषणाच्या मुद्द्यावर सर्वोच्च न्यायालयाने दिलेल्या आदेशांचा संदर्भ जिल्हाधिकारी यांनी दिला आहे. धार्मिक आणि सार्वजनिक कार्यक्रमांच्या नावाखाली ध्वनीप्रदूषणाच्या मर्यादा ओलांडता येणार नाहीत. ध्वनीक्षेपकांच्या वापराबाबत निर्धारित वेळ आणि ध्वनीची मर्यादा यांचे पालन करणे बंधनकारक आहे.त्यामुळे गणेशोत्सव मंडळांनी न्यायालयीन आदेश आणि प्रशासनाने घालून दिलेल्या नियमांचे पालन करणे आवश्यक आहे. नियमांचे उल्लंघन केल्यास संबंधित आयोजकांवर कायदेशीर कारवाई करण्यात येणार आहे.
पोलिस आणि प्रशासनाची विशेष नजर
गणेशोत्सवाच्या काळात शहरातील संवेदनशील भागांमध्ये ध्वनीपातळी तपासण्यासाठी प्रशासन आणि पोलिसांकडून विशेष यंत्रणा राबवली जाण्याची शक्यता आहे. मंडळांच्या कार्यक्रमांवर तसेच मिरवणुकीदरम्यान वापरल्या जाणाऱ्या ध्वनीक्षेपकांवर लक्ष ठेवले जाणार आहे.रात्रीच्या वेळेत ध्वनीप्रदूषणाचे नियम मोडले जात आहेत का, याची तपासणी केली जाणार आहे. नियमभंग आढळल्यास संबंधित मंडळ, आयोजक किंवा जबाबदार व्यक्तींवर कारवाई होऊ शकते.
'उत्सव साजरा करा, पण नियम पाळा'
गणेशोत्सवाच्या परंपरेला कोणताही अडथळा निर्माण करण्याचा प्रशासनाचा उद्देश नाही. मात्र उत्सवाच्या आनंदामुळे इतर नागरिकांच्या आरोग्यावर आणि शांततेवर परिणाम होऊ नये, यासाठी नियमांचे पालन आवश्यक असल्याचे प्रशासनाने स्पष्ट केले आहे.यामुळे यंदाच्या गणेशोत्सवात पुणेकरांना डीजेचा दणदणाट आणि लेझर शोऐवजी पारंपरिक व सांस्कृतिक कार्यक्रमांवर भर देण्याचे आवाहन करण्यात आले आहे. "ध्वनीप्रदूषणाचे नियम पाळा; अन्यथा गुन्हा दाखल होणारच," असा स्पष्ट संदेश जिल्हाधिकाऱ्यांनी दिल्याने गणेश मंडळांकडून या निर्णयाकडे आता विशेष लक्ष लागले आहे.
हेही वाचा:Lalbaugcha Raja 2026: लालबागच्या राजाच्या दर्शनाच्या वेळा, मार्ग, दर्शन रांग आणि तारखांची संपूर्ण माहिती, पाहा FAQ