नवी दिल्ली. कर्नाटकातील सत्ताबदलाचा सस्पेन्स कायम आहे. मुख्यमंत्री सिद्धरामय्या यांच्या राजीनाम्याची आणि डी. के. शिवकुमार यांच्या मुख्यमंत्रीपदी नियुक्तीची चर्चा सुरू असतानाच, एक महत्त्वपूर्ण बातमी समोर येत आहे.

उपमुख्यमंत्री डी. के. शिवकुमार बंगळूर येथील मुख्यमंत्र्यांच्या निवासस्थानी दाखल झाले असून, तिथे त्यांनी मुख्यमंत्री सिद्धरामय्या यांची भेट घेतली.

बंगळूरु येथील मुख्यमंत्र्यांच्या निवासस्थानी नाश्त्याच्या बैठकीदरम्यान कर्नाटकचे मुख्यमंत्री सिद्धरामय्या आणि उपमुख्यमंत्री डी. के. शिवकुमार यांनी एकमेकांची गळाभेट घेतली. शिवकुमार यांनी मुख्यमंत्री सिद्धरामय्या यांच्या पाया पडून त्यांचे आशीर्वाद घेतले.

मुख्यमंत्री सिद्धरामय्या यांच्या निवासस्थानी बैठक सुरू आहे. कर्नाटक काँग्रेसची सूत्रे कोणाकडे सोपवली जातील, हे या बैठकीत निश्चित होण्याची शक्यता आहे.

मुख्यमंत्री कार्यालयाने शेअर केलेल्या एका फोटोमध्ये सिद्धरामय्या शिवकुमार यांना आलिंगन देताना दिसत आहेत. दुसऱ्या फोटोमध्ये मुख्यमंत्रीपदाचे उमेदवार शिवकुमार सिद्धरामय्या यांच्या पाया पडताना आणि त्यांचे आशीर्वाद घेताना दिसत आहेत. शिवकुमार यांना संधी देण्यासाठी सिद्धरामय्या नाश्त्याच्या बैठकीत मुख्यमंत्रीपदाचा राजीनामा जाहीर करू शकतात, अशी शक्यता वर्तवली जात आहे.

सिद्धरामय्या यांनी राज्यपालांकडे वेळ मागितला नाही-

पीटीआय या वृत्तसंस्थेनुसार, लोक भवनच्या अधिकाऱ्यांनी गुरुवारी सांगितले की, मुख्यमंत्र्यांनी अद्याप राज्यपाल थावरचंद गेहलोत यांच्या भेटीची वेळ मागितलेली नाही. मुख्यमंत्री कार्यालयातील वरिष्ठ सूत्रांनी बुधवारी सिद्धरामय्या यांनी आज गेहलोत यांच्या भेटीची वेळ मागितल्याचे सांगितल्यानंतर दुसऱ्याच दिवशी ही घडामोड समोर आली आहे.

लोक भवनच्या अधिकाऱ्यांनी सांगितले की, राज्यपाल थावरचंद गेहलोत हे मध्य प्रदेशातील त्यांच्या मूळ गावी इंदूर येथे आहेत. मुख्यमंत्र्यांनी गेहलोत यांच्या भेटीची विनंती केली आहे का, असे विचारले असता, लोक भवनच्या एका वरिष्ठ अधिकाऱ्याने सांगितले, "महामहिम येथे नाहीत. अशी कोणतीही माहिती नाही. या क्षणी असा कोणताही संदेश किंवा माहिती मिळालेली नाही."