जेएनएन, मुंबई: मराठा आरक्षणाच्या मागणीसाठी मराठा आंदोलक मनोज जरांगे पाटील आजपासून पुन्हा एकदा आमरण उपोषणाला बसत आहेत. सरकारच्या शिष्टमंडळासोबत झालेली चर्चा कोणत्याही निष्कर्षाशिवाय संपल्यानंतर त्यांनी उपोषणाचा निर्णय कायम ठेवला आहे.

आज सकाळी 10 वाजल्यापासून जालना जिल्ह्यातील आंतरवाली सराटी येथे उपोषणाला सुरुवात होणार आहे.

काल राज्य सरकारच्या वतीने मंत्री राधाकृष्ण विखे पाटील आणि प्रसाद लाड यांनी जरांगे पाटील यांची भेट घेऊन त्यांची समजूत काढण्याचा प्रयत्न केला. जवळपास दीड तास चाललेल्या चर्चेत मराठा आरक्षण, कुणबी प्रमाणपत्रे, हैदराबाद गॅझेट आणि सगेसोयरे अंमलबजावणी यांसह विविध मुद्द्यांवर सविस्तर चर्चा झाली. मात्र कोणताही ठोस तोडगा न निघाल्याने जरांगे आपल्या भूमिकेवर ठाम राहिले.

सरकारला आणखी वेळ देण्यास नकार
चर्चेनंतर बोलताना जरांगे पाटील यांनी सरकारला यापुढे कोणतीही मुदत देणार नसल्याचे स्पष्ट केले. मराठा समाजाच्या मागण्यांबाबत सरकारने वारंवार आश्वासने दिली, मात्र प्रत्यक्ष अंमलबजावणी झालेली नाही, असा आरोप त्यांनी केला. त्यामुळे मागण्या पूर्ण होईपर्यंत उपोषण सुरू ठेवण्याचा निर्धार त्यांनी व्यक्त केला.

मराठा समाजाच्या प्रमुख मागण्या
जरांगे पाटील यांनी सरकारसमोर मांडलेल्या मागण्यांमध्ये पुढील मुद्द्यांना विशेष महत्त्व आहे -

* मराठवाड्यातील सर्व मराठा समाजबांधवांना कुणबी प्रमाणपत्र देण्यात यावे.

* हैदराबाद संस्थानातील नोंदी आणि गॅझेटच्या आधारे मराठा समाजाला कुणबी म्हणून मान्यता द्यावी.

* सगेसोयरे अध्यादेशाची प्रभावी अंमलबजावणी करावी.

* मराठा समाजाला टिकणारे आणि न्यायालयात वैध ठरणारे आरक्षण द्यावे.

* मराठा आंदोलकांवरील गुन्हे मागे घ्यावेत.

* आरक्षण प्रक्रियेत कोणताही विलंब न करता तातडीने निर्णय घ्यावा.

आंतरवाली सराटीत आंदोलनाची तयारी
जरांगे यांच्या उपोषणासाठी आंतरवाली सराटीमध्ये मोठ्या प्रमाणावर मराठा समाजाचे कार्यकर्ते आणि आंदोलक जमा होण्यास सुरुवात झाली आहे. राज्याच्या विविध भागांतून समाजबांधव येथे दाखल होत असून आंदोलनाला व्यापक स्वरूप मिळण्याची शक्यता आहे. प्रशासनानेही परिसरात आवश्यक बंदोबस्त तैनात केला आहे.