मुंबई Mumbai Metro Line 5: महानगर प्रदेशातील वाढत्या वाहतूक कोंडीला पर्याय देण्यासाठी उभारण्यात येत असलेली मुंबई मेट्रो लाइन 5 आता महत्त्वाच्या टप्प्यात पोहोचली आहे. ठाणे-भिवंडी-कल्याण या वेगाने विकसित होणाऱ्या पट्ट्याला जोडणारी ही मेट्रो मार्गिका विस्तारित टप्प्याला मंजुरी मिळाल्यानंतर अधिक भव्य स्वरूपात समोर येत आहे.

प्रकल्पाची एकूण लांबी आता सुमारे 34.21 किलोमीटरपर्यंत वाढली असून, ती मुंबई महानगर प्रदेशातील सर्वात मोठ्या मेट्रो कॉरिडॉरपैकी एक ठरणार आहे.

या मार्गिकेमुळे ठाणे, भिवंडी आणि कल्याण दरम्यानची प्रवास व्यवस्था अधिक जलद, सुलभ आणि विश्वासार्ह होणार आहे. विशेषतः रोज नोकरी, व्यवसाय आणि शिक्षणासाठी प्रवास करणाऱ्या लाखो प्रवाशांना याचा मोठा फायदा होण्याची अपेक्षा आहे.

कसा आहे मेट्रो 5 चा संपूर्ण मार्ग?

मेट्रो 5 ही प्रामुख्याने ठाणेतील कपूरबावडीपासून सुरू होऊन भिवंडीमार्गे कल्याणपर्यंत धावणार आहे. ही मार्गिका पूर्णपणे उन्नत (Elevated) स्वरूपात विकसित केली जात आहे.

मार्गावरील प्रमुख स्थानके पुढीलप्रमाणे असतील :

* कपूरबावडी

* बाळकुम

* कासारवडवली परिसर

* गाईमुख

* भिवंडी

* अंजूरफाटा

* कल्याण परिसरातील विविध स्थानके

या मार्गिकेमुळे ठाणे , भिवंडी आणि कल्याण यांच्यातील कनेक्टिव्हिटी मोठ्या प्रमाणावर सुधारेल. सध्या या भागात रस्ते वाहतुकीवर प्रचंड ताण असून, प्रवाशांना वाहतूक कोंडीत तासन्तास अडकावे लागते. मेट्रो सुरू झाल्यानंतर हा प्रवास कमी वेळेत पूर्ण होणार आहे.

विस्तारित टप्प्याला मंजुरी

प्रकल्पाच्या विस्तारित टप्प्याला मंजुरी मिळाल्यानंतर मार्गिकेची लांबी वाढली आहे. यामुळे भविष्यातील प्रवासी वाढ लक्षात घेऊन अधिक व्यापक नेटवर्क तयार करण्याचा प्रयत्न करण्यात येत आहे. मेट्रो 5 ला भविष्यात इतर मेट्रो मार्गिकांशी जोडण्याचाही आराखडा आहे. त्यामुळे एमएमआरमधील मल्टी-मोडल ट्रान्सपोर्ट नेटवर्क अधिक मजबूत होणार आहे.

CMRS चाचणी लवकरच

मेट्रो प्रकल्पाच्या पहिल्या टप्प्याची CMRS (Commissioner of Metro Rail Safety) चाचणी लवकरच होणार असल्याची माहिती समोर आली आहे. ही चाचणी यशस्वी झाल्यानंतर प्रत्यक्ष प्रवासी सेवा सुरू करण्याचा मार्ग मोकळा होईल. सध्या ट्रॅक, सिग्नलिंग, वीज व्यवस्था आणि स्थानकांवरील अंतिम कामे वेगाने सुरू आहेत.