चंद्रपूर जिल्ह्यातील ब्रह्मपुरी, वर्धा, अकोला आणि अमरावती या भागांमध्ये उन्हाचा तडाखा असह्य झाला असून दुपारच्या वेळेत रस्त्यांवर अक्षरशः शुकशुकाट पाहायला मिळत आहे. भारतीय हवामान विभागाने (IMD) पुढील काही दिवस विदर्भासाठी 'हीटवेव्ह'चा इशारा दिला आहे.

'नवतपा' म्हणजे नेमकं काय?
भारतीय पंचांगानुसार सूर्य जेव्हा रोहिणी नक्षत्रात प्रवेश करतो, त्या कालावधीला 'नवतपा' म्हटलं जातं. साधारणपणे हा काळ 9 दिवसांचा असतो आणि वर्षातील सर्वाधिक उष्ण दिवस म्हणून ओळखला जातो. यंदा 25 मे ते 2 जूनदरम्यान हा कालावधी आहे. या दिवसांत सूर्यकिरण पृथ्वीवर अधिक तीव्रतेने पडतात आणि त्यामुळे तापमान झपाट्याने वाढते.

विदर्भातच उष्णतेचा सर्वाधिक फटका का?
हवामान तज्ज्ञांच्या मते, विदर्भातील उष्णतेमागे अनेक कारणे आहेत.

* उत्तर आणि मध्य भारतातून येणारे कोरडे वारे

* वातावरणातील उच्च दाबाचा पट्टा

* ढगांची अनुपस्थिती

* जमिनीतील आर्द्रता कमी होणे

* वाऱ्यांचा वेग मंदावणे

या सर्व घटकांमुळे सूर्याची उष्णता थेट जमिनीवर पडते आणि तापमान विक्रमी पातळीवर पोहोचते. अकोला, वर्धा आणि ब्रह्मपुरी या भागांमध्ये तापमान 47 अंशांच्या पुढे गेले असून महाराष्ट्रातील सर्वाधिक उष्ण भाग म्हणून विदर्भाची नोंद झाली आहे.

नागरिक त्रस्त; दुपारी रस्ते ओस
सकाळी 11 ते दुपारी 4 या वेळेत उष्णतेची तीव्रता सर्वाधिक जाणवत आहे. परिणामी बाजारपेठा, चौक आणि महामार्गांवर वाहनांची वर्दळ कमी झाली आहे. अनेक शहरांमध्ये दुपारी रस्ते निर्मनुष्य दिसत आहेत. शाळकरी मुले, ज्येष्ठ नागरिक आणि मजूर वर्गाला याचा सर्वाधिक फटका बसत आहे.

उष्माघाताचा धोका वाढला
आरोग्य तज्ज्ञांनी नागरिकांना सतर्कतेचा इशारा दिला आहे. वाढत्या तापमानामुळे उष्माघात, डिहायड्रेशन, चक्कर येणे, थकवा आणि रक्तदाबाच्या तक्रारी वाढत आहेत.

हेही वाचा: Maharashtra Weather Update: पुढील 24 तासांत 'या' जिल्ह्यांत तीव्र उष्णतेची लाट!; थेट मंत्रालयातून अलर्ट जारी