अंतिम सामन्यात इंग्लंडचा सामना बलाढ्य ऑस्ट्रेलियन संघाशी होईल.

ब्रंट आणि नाईट यांनी संघाला कठीण परिस्थितीतून बाहेर काढले आणि विजयाचा पाया रचला. प्रथम फलंदाजी करताना, इंग्लंडची अवस्था एकवेळ 23 धावांवर तीन गडी बाद अशी होती. तिथून पुढे, ब्रंट आणि नाईट यांनी चौथ्या विकेटसाठी 133 धावांची भागीदारी करून संघाला 20 षटकांत 5 बाद 169 अशी मजबूत धावसंख्या उभारून दिली. या धावसंख्येचा पाठलाग करताना, दक्षिण आफ्रिका 20 षटकांत 8 गडी बाद 129 धावाच करू शकली. इंग्लंडने हा सामना 40 धावांच्या मोठ्या फरकाने जिंकला.

तीन सामन्यांनंतर पुनरागमन

तीन सामन्यांनंतर ब्रंटने संघात पुनरागमन केले आणि एक शानदार खेळी खेळली. ती पोटरीच्या दुखापतीमुळे संघाबाहेर होती. इंग्लंडच्या कर्णधाराने या सामन्यात पुनरागमन केले आणि 47 चेंडूंच्या खेळीत 11 चौकार व एका षटकारासह 75 धावा केल्या. दुसरीकडे, नाईटने 47 चेंडूंमध्ये सहा चौकार आणि एका षटकारासह 58 धावांचे योगदान दिले.

आफ्रिकेच्या शबनिम इस्माईल आणि मरिझान कॅप यांनी सुरुवातीच्या षटकांमध्ये इंग्लंडला मोठा धक्का दिला. यजमान संघ पॉवरप्लेमध्ये विशेष प्रभाव पाडण्यात अपयशी ठरला. इस्माईलने दुसऱ्या षटकाच्या दुसऱ्याच चेंडूवर एमी जोन्सला बाद केले, जिने केवळ दोन धावा केल्या. कॅपने तिसऱ्या षटकाच्या दुसऱ्याच चेंडूवर डॅनी वायटला 12 धावांवर बाद केले. त्यानंतर इस्माईलने एलिसा कॅप्सीला बाद केले. तिथून पुढे ब्रंट आणि नाईट यांनी डाव सावरला.

156 धावांवर ब्रंटही बाद झाली. तिच्या बाद झाल्यानंतर, एका धावेची भर घालून नाईटही बाद झाली. नॉनकुलुलेकू म्लाबाने दोन्ही बळी घेतले. फ्रेया कॅम्प एक धाव काढून नाबाद राहिली आणि डॅनी गिब्सन सहा धावांवर नाबाद राहिली.

दक्षिण आफ्रिकेची फलंदाजी अपयशी -

दक्षिण आफ्रिकेला अंतिम फेरीत पोहोचण्यासाठी 170 धावांची गरज होती. कर्णधार लॉरा वॉल्व्हार्ड आणि तंजीम ब्रिट्स यांनी संघाला चांगली सुरुवात करून देण्याचा प्रयत्न केला. लिन्सी स्मिथने सहाव्या षटकाच्या चौथ्या चेंडूवर दक्षिण आफ्रिकेच्या कर्णधाराला बाद करून संघाला पहिले यश मिळवून दिले. आफ्रिकेकडून केवळच तंजीमच झुंज देऊ शकली. तिला दुसऱ्या टोकाकडून कोणाचीही साथ मिळाली नाही. अँरी डर्कसेन (3), कॅप (5), सुने लुस (11), नादिन डी क्लर्क (14 नाबाद) आणि क्लोई ट्रायॉन (12) यांना काही विशेष करता आले नाही. तंजीमने आपल्या 45 चेंडूंच्या खेळीत सहा चौकारांच्या मदतीने 51 धावा केल्या.

इंग्लंडकडून लॉरेन बेल आणि चार्ली डीन यांनी प्रत्येकी दोन बळी घेतले, तर लिन्सी स्मिथ, सोफी एक्लेस्टोन आणि कॅम्प यांनी प्रत्येकी एक बळी घेतला.

हे ही वाचा -क्रिकेटविश्वाला काळिमा.. ऑस्ट्रेलियाचा दिग्गज क्रिकेटपटू बाल लैंगिक शोषणाच्या गुन्ह्यात दोषी, लवकरच सुनावली जाणार शिक्षा