अजित पवार यांच्या निधनानंतर रिक्त झालेल्या बारामती विधानसभा मतदारसंघातील पोटनिवडणुकीसाठी आता राजकीय वातावरण तापले आहे. ही निवडणूक बिनविरोध व्हावी यासाठी उपमुख्यमंत्री सुनेत्रा पवार यांनी प्रयत्न केले होते, मात्र काँग्रेसने आपला उमेदवार जाहीर केल्याने ही निवडणूक आता चुरशीची होणार असल्याचे स्पष्ट झाले आहे.
काँग्रेसने प्रदेश सचिव आकाश मोरे यांना निवडणुकीच्या रिंगणात उतरवले असून, ते माजी आमदार विजयराव मोरे यांचे पुत्र आहेत. धनगर समाजातील असलेल्या आकाश मोरे यांच्या उमेदवारीमुळे सुनेत्रा पवार यांच्यासाठी ही निवडणूक बिनविरोध राहण्याची शक्यता आता संपुष्टात आली आहे. सुनेत्रा पवार यांनी काँग्रेस प्रदेशाध्यक्ष हर्षवर्धन सपकाल आणि शिवसेना प्रमुख उद्धव ठाकरे यांच्याशी संपर्क साधून ही निवडणूक बिनविरोध करण्याचे आवाहन केले होते, परंतु काँग्रेसने आपला स्वतंत्र मार्ग निवडला आहे. शरद पवार यांच्या राष्ट्रवादी काँग्रेसने यापूर्वीच अजित पवार यांच्या सन्मानार्थ या निवडणुकीतून माघार घेतली होती, मात्र काँग्रेसच्या निर्णयामुळे बारामतीमध्ये २३ एप्रिल रोजी मतदान आणि ४ मे रोजी निकाल जाहीर होणार आहे.