संतोष पंडित हे सतत पुण्यातील नागरिक समस्या आणि विविध मुद्द्यांवर सोशल मीडियाच्या माध्यमातून आवाज उठवत असतात. या कारवाईच्या अवघ्या एक दिवस आधी संतोष पंडित यांची सत्ताधारी भाजपचे नेते गोपीचंद पडळकर यांच्याशी उच्च-सुरक्षा नोंदणी प्लेट (HSRP) नसलेल्या वाहनावरून बाचाबाची झाली होती, ज्याचा व्हिडिओ सोशल मीडियावर प्रचंड व्हायरल झाला होता. या घटनेनंतर पडळकर यांच्या सहकाऱ्यांनी पंडित यांना शिवीगाळ केल्याची कथित ऑडिओ क्लिपही समोर आली होती.

भाजप नेते सुनील पांडे यांनी ३० ऑगस्ट रोजी दिलेल्या तक्रारीच्या आधारे कोथरूड पोलिसांनी संतोष पंडित यांच्याविरुद्ध एफआयआर नोंदवला होता. संतोष पंडित यांनी 'राजकारण एक्सप्रेस' या सोशल मीडिया अकाउंटवरून प्रसारित केलेल्या व्हिडिओमध्ये मंत्री चंद्रकांत पाटील यांच्याविरुद्ध अपमानास्पद, अश्लील आणि बदनामीकारक वक्तव्ये केल्याचा आरोप आहे. याप्रकरणी त्यांच्यावर भारतीय न्याय संहितेच्या (BNS) कलम ३५६, २९६ आणि ३(५) अन्वये गुन्हे दाखल करण्यात आले आहेत. यापूर्वी मार्च महिन्यात एका महिलेने पंडित यांच्याविरोधात गैरवर्तन आणि विनयभंगाची तक्रार दाखल केली होती. ताब्यात घेण्यापूर्वी पंडित यांनी पोलिसांच्या वागणुकीवर तीव्र नाराजी व्यक्त करत मुख्यमंत्री देवेंद्र फडणवीस यांना या घटनेची दखल घेण्याचे आवाहन केले आहे. रात्रीच्या वेळी घरात घुसून अशा प्रकारे कारवाई करणे हे सामान्य नागरिकांच्या हक्कांवर गदा आणणारे असल्याचे त्यांनी आपल्या व्हिडिओमध्ये म्हटले आहे.