युवा काँग्रेसचे राष्ट्रीय अध्यक्ष उदय भानू चिब आणि आमदार सतेज पाटील यांच्या प्रमुख नेतृत्वाखाली हा मोर्चा काढण्यात आला होता. या आंदोलनात जिल्ह्यातील शेकडो तरुण आणि कार्यकर्ते मोठ्या संख्येने रस्त्यावर उतरले होते. आंदोलकांनी हातामध्ये जळत्या मशाली, तिरंगा ध्वज आणि विद्यार्थ्यांच्या भविष्याशी खेळणाऱ्या पेपरफुटी प्रकरणाचा निषेध करणारे फलक धरले होते. सातत्याने होणाऱ्या या परीक्षा घोटाळ्यांमुळे देशातील कोट्यवधी विद्यार्थ्यांचे भवितव्य धोक्यात आले असून, याला सर्वस्वी केंद्र सरकारच जबाबदार असल्याचा घणाघात युवा काँग्रेसने केला आहे. केंद्र सरकारच्या विरोधातील हे आंदोलन त्यांच्या देशव्यापी मोहिमेचा एक महत्त्वाचा भाग असून कोल्हापूर शहरातील प्रमुख मार्गांवरून काढण्यात आलेला हा मशाल मोर्चा पूर्णपणे शांततेत पार पडला.