ठाणे जिल्ह्यातील उल्हासनगर येथील हिरा घाट परिसरात एक धक्कादायक घटना घडली आहे. येथील अत्यंत धोकादायक झालेली 'लेक व्ह्यू' नावाची चार मजली इमारत काही क्षणांत पत्त्यांसारखी कोसळली.
या अचानक झालेल्या दुर्घटनेमुळे संपूर्ण परिसरात एकच खळबळ उडाली असून नागरिकांमध्ये भीतीचे वातावरण पसरले आहे.
प्रत्यक्षदर्शींनी दिलेल्या माहितीनुसार, इमारत कोसळण्यापूर्वी एक प्रचंड मोठा आवाज झाला आणि पाहता पाहता संपूर्ण इमारत रस्त्यावर आली व तिचे रूपांतर ढिगाऱ्यात झाले. दुर्घटना घडली त्या वेळी परिसरात लोकांची ये-जा सुरू होती, परंतु इमारत कोसळत असल्याचे पाहताच नागरिकांनी वेळीच धाव घेतल्याने एक मोठी आणि भीषण जीवितहानी टळली आहे.
स्थानिक नागरिकांच्या म्हणण्यानुसार, ही इमारत आधीच प्रशासनाकडून अत्यंत जर्जर आणि धोकादायक घोषित करण्यात आली होती. तरीही तिच्या आसपास लोकांचा वावर सुरूच होता. इमारत कोसळल्यानंतर संपूर्ण परिसरात धुळीचे साम्राज्य पसरले होते, ज्यामुळे काही काळ वाहतुकीवरही मोठा परिणाम झाला. या संपूर्ण घटनेचा थरारक व्हिडिओ सध्या सोशल मीडियावर प्रचंड व्हायरल होत आहे.
घटनेची माहिती मिळताच पोलीस, अग्निशामक दल आणि महानगरपालिका प्रशासनाचे पथक तातडीने घटनास्थळी दाखल झाले. प्रशासनाने सुरक्षेचा उपाय म्हणून संपूर्ण परिसराला वेढा घातला असून ढिगारा उपसण्याचे काम वेगाने सुरू केले आहे. ही इमारत दुर्घटना घडण्यापूर्वी रिकामी करण्यात आली होती की नाही, याचा तपास आता प्रशासन करत आहे. तसेच भविष्यात अशा दुर्घटना टाळण्यासाठी परिसरातील इतर धोकादायक इमारतींची पाहणी आणि निरीक्षण करण्याचे कामही प्रशासनाकडून सुरू करण्यात आले आहे.