अंतिम सामन्यात तिने कॅनडाच्या हायडी क्वाच (Heidi Quach) हिचा ‘गोल्डन स्कोअर’मध्ये पराभव करत भारताला आणखी एक सुवर्णपदक मिळवून दिले.

त्रिपुरातील 23 वर्षीय अस्मितासाठी अंतिम सामना सुरुवातीला कठीण ठरला. सामन्याच्या प्रारंभी तिने एक युको गुण गमावला आणि त्यानंतर तिला पेनल्टी मिळाला. त्यामुळे कॅनडाच्या हायडी क्वाचने सामन्यावर सुरुवातीला वर्चस्व मिळवले होते. मात्र, अस्मिताने हार न मानता आक्रमक खेळ करत पुनरागमन केले. चार मिनिटांच्या नियोजित वेळेतील मध्यंतरानंतर तिने शानदार खेळी करत सामना 1-1 असा बरोबरीत आणला.

नियोजित वेळ संपेपर्यंत दोन्ही खेळाडूंना निर्णायक गुण मिळवता आले नाहीत. त्यामुळे सामना ‘गोल्डन स्कोअर’मध्ये गेला. या टप्प्यात पहिला गुण मिळवणारा खेळाडू विजेता ठरतो. दबावाखालीही शांतपणे खेळत अस्मिताने अतिरिक्त वेळेत निर्णायक आक्रमण केले आणि आणखी एक युको गुण मिळवत सुवर्णपदकावर नाव कोरले.

अस्मिताच्या या विजयाने तिच्या संपूर्ण स्पर्धेतील दमदार कामगिरीवर शिक्कामोर्तब झाले. अंतिम सामन्यात सुरुवातीला पिछाडीवर असतानाही तिने उल्लेखनीय जिद्द, संयम आणि उत्कृष्ट तांत्रिक कौशल्य दाखवत कॅनडाच्या प्रतिस्पर्ध्याला पराभूत केले आणि भारताच्या पदकतालिकेत आणखी एका सुवर्णाची भर घातली.