जळगाव-लाईव्ह ट्रेंड्स न्यूज प्रतिनिधी । मुंबईतील वर्षा बंगला येथे आज सायंकाळी झालेल्या महत्त्वपूर्ण बैठकीत जळगाव महानगरपालिकेशी संबंधित अटलांटा कन्स्ट्रक्शन प्रकरणाला निर्णायक वळण मिळाले असून, या प्रकरणात मुख्यमंत्र्यांनी थेट हस्तक्षेप करत फौजदारी गुन्हा दाखल करण्याचे आदेश दिल्याची माहिती समोर आली आहे.
जळगाव शहर पोलीस ठाण्यात अटलांटा कन्स्ट्रक्शन कंपनीविरुद्ध नगरसेवक अरविंद देशमुख यांनी यापूर्वीच फौजदारी तक्रार दाखल केली होती. या तक्रारीमध्ये महापालिकेची आर्थिक फसवणूक, विश्वासघात आणि कोट्यवधी रुपयांचा अपहार झाल्याचे गंभीर आरोप करण्यात आले आहेत. या आरोपांमुळे प्रकरण आधीपासूनच चर्चेत होते आणि प्रशासनावर कारवाईचा दबाव वाढत होता.
आजच्या बैठकीत नामदार गिरीश महाजन, आमदार राजू मामा भोळे, नंदू आडवाणी, मनोज काळे तसेच तक्रारदार नगरसेवक अरविंद देशमुख यांनी मुख्यमंत्री देवेंद्र फडणवीस यांची भेट घेतली. या भेटीत अरविंद देशमुख यांनी स्वतः दाखल केलेल्या तक्रारीचा सविस्तर संदर्भ मांडत प्रकरणातील सर्व बाबींचे स्पष्टीकरण दिले. त्यांनी सादर केलेल्या पुराव्यांमुळे आणि माहितीमुळे प्रकरणाची गंभीरता अधिक अधोरेखित झाली.
मुख्यमंत्र्यांनी संपूर्ण बाब गांभीर्याने ऐकून घेतल्यानंतर तात्काळ दखल घेत जळगाव महानगरपालिकेचे आयुक्त ज्ञानेश्वर ढोरे यांच्याशी दूरध्वनीवरून संपर्क साधला. त्यांनी या प्रकरणात सरकारी स्तरावरून फौजदारी गुन्हा दाखल करण्याचे स्पष्ट आदेश दिल्याचे सांगितले जात आहे. या निर्णयामुळे प्रकरणाला अधिकृत गती मिळणार असून, तपास प्रक्रियेला नवे बळ मिळण्याची शक्यता आहे.
या आदेशानंतर महापालिका प्रशासनाकडून थेट कारवाईचा मार्ग मोकळा झाला आहे. आधीच नगरसेवक अरविंद देशमुख यांच्या तक्रारीमुळे प्रकरणाची तीव्रता स्पष्ट झाली होती; आता शासनस्तरावरून हस्तक्षेप झाल्यामुळे दोषींवर कठोर कारवाई होण्याची शक्यता अधिक दृढ झाली आहे. या घडामोडींमुळे संबंधित अधिकारी आणि कंत्राटदारांमध्ये खळबळ उडाली आहे.
दरम्यान, जळगाव शहरात या प्रकरणामुळे मोठी राजकीय आणि प्रशासकीय हालचाल निर्माण झाली असून, पुढील कारवाईकडे सर्वांचे लक्ष लागले आहे. या प्रकरणातून नेमके कोणते निष्कर्ष समोर येतात आणि कोणावर जबाबदारी निश्चित होते, याबाबत उत्सुकता वाढली आहे.