यावल- लाईव्ह ट्रेंड्स न्यूज प्रतिनिधी । शहरातील नागरिकांच्या सुरक्षिततेचा आणि सुविधेचा प्रश्न ऐरणीवर आल्यानंतर प्रशासनाकडून तातडीने प्रत्यक्ष कृती करून घेणे हे लोकप्रतिनिधीचे खरे कर्तव्य असते.
याच भूमिकेतून यावल शहरातील ताकेश्वर मंदिराकडे जाणारा मुख्य मार्ग आणि बसमाळा परिसरात वाढलेली काटेरी झाडे-झुडपे हटवून रस्ता मोकळा करण्यात आला आहे, ज्यामुळे नागरिक आणि वाहनधारकांना मोठा दिलासा मिळाला आहे.
नगरपालिका कार्यक्षेत्रातील ताकेश्वर मंदिराकडे जाणाऱ्या प्रमुख मार्गावर तसेच बसमाळा परिसराच्या बाजूला गेल्या काही दिवसांपासून मोठ्या प्रमाणावर काटेरी झाडे, झुडपे आणि रानटी गवत वाढले होते. रस्त्याच्या कडेला वाढलेली ही झाडे थेट मुख्य रस्त्यावर आल्याने वाहतुकीस प्रचंड अडथळा निर्माण होत होता. त्यामुळे पादचारी, दुचाकीस्वार आणि दररोज मंदिराकडे जाणाऱ्या शेकडो भाविकांना ये-जा करताना मोठा मनस्ताप आणि धोक्याचा सामना करावा लागत होता.
नागरिकांची ही गंभीर अडचण लक्षात घेऊन नगरपालिकेतील भारतीय जनता पक्षाच्या गटनेत्या तथा नगरसेविका नंदाताई राजेंद्र महाजन यांनी या प्रश्नात तातडीने हस्तक्षेप केला. त्यांनी केवळ कागदी निवेदने किंवा तोंडी आश्वासनांवर न थांबता नगरपालिका प्रशासनाकडे प्रत्यक्ष जाऊन तातडीने सफाई करण्याची आग्रही मागणी केली. यासोबतच त्यांनी स्वतः घटनास्थळी उपस्थित राहून कामाची पाहणी व सातत्याने पाठपुरावा केला. नंदाताई महाजन यांच्या या थेट पाठपुराव्यामुळे नगरपालिका प्रशासनाने तातडीने जेसीबी यंत्राची व्यवस्था करून रस्त्यालगतची सर्व काटेरी झाडे-झुडपे मुळासकट उपटून काढली. ताकेश्वर मंदिराकडे जाणाऱ्या या मुख्य रस्त्यावर नेहमीच भाविक आणि नागरिकांची मोठी वर्दळ असते. रस्ता स्वच्छ आणि रुंद झाल्यामुळे आता वाहतूक सुरळीत झाली असून परिसरातील रहिवाशांनी समाधान व्यक्त केले आहे. "नागरिकांच्या मूलभूत समस्या सोडवण्यासाठी जागेवर उपस्थित राहून काम पूर्ण होईपर्यंत पाठपुरावा करणे हीच आमची भूमिका आहे," असे मत यावेळी नंदाताई महाजन यांनी मांडले.