नवी दिल्ली : राष्ट्रीय राजधानी दिल्लीतील विवेक विहार परिसरात रविवारी पहाटे घडलेल्या भीषण आगीच्या दुर्घटनेत नऊ जणांचा मृत्यू झाला असून अनेकांना सुरक्षित बाहेर काढण्यात यश आले आहे.

चार मजली निवासी इमारतीत लागलेल्या या आगीमुळे संपूर्ण परिसरात भीतीचे वातावरण निर्माण झाले.
पोलिसांनी दिलेल्या माहितीनुसार, पहाटे सुमारे तीन वाजून अठ्ठेचाळीस मिनिटांनी आग लागल्याची माहिती नियंत्रण कक्षाला मिळाली. त्यानंतर पोलीस, अग्निशमन दल आणि आपत्कालीन पथके तातडीने घटनास्थळी दाखल झाली. विवेक विहार फेज एक येथील घर क्रमांक बी तेरा येथे ही दुर्घटना घडली. इमारतीच्या दुसर्‍या, तिसर्‍या आणि चौथ्या मजल्यावर आगीच्या प्रचंड ज्वाळा उसळत होत्या. अग्निशमन दलाने वेगाने कारवाई करत बचावमोहीम सुरू केली. या मोहिमेत आगीत अडकलेल्या दहा ते पंधरा जणांना सुरक्षित बाहेर काढण्यात आले. दोन जण किरकोळ भाजले असून त्यांच्यावर गुरु तेग बहादुर रुग्णालयात उपचार सुरू आहेत. आग विझवण्यासाठी बारा अग्निशमन गाड्या तैनात करण्यात आल्या होत्या. अनेक तासांच्या प्रयत्नांनंतर आग नियंत्रणात आणण्यात यश आले. अधिकार्‍यांनी सांगितले की, आगीमुळे इमारतीतील सहा घरांमध्ये मोठे नुकसान झाले आहे. विविध मजल्यांवरून जळालेल्या अवस्थेत नऊ मृतदेह बाहेर काढण्यात आले. प्राथमिक माहितीनुसार, इमारतीतील एका थंडकरण यंत्रात स्फोट झाल्यामुळे आग लागली असावी, असा अंदाज व्यक्त करण्यात येत आहे. तसेच विद्युत बिघाडासारख्या इतर कारणांचाही तपास सुरू आहे. काही नागरिक धूर आणि आगीपासून बचाव करण्यासाठी जिन्याजवळील बंद दरवाजामागे आश्रयाला गेले होते, मात्र ते बाहेर पडू शकले नसल्याची शक्यता व्यक्त केली जात आहे. पोलीसांनी या प्रकरणी गुन्हा नोंदवून सखोल तपास सुरू केला आहे. इमारतीतील अग्निसुरक्षा व्यवस्था, सुरक्षेचे नियम पाळले गेले होते का आणि बांधकामाचे निकष योग्य होते का, याचीही चौकशी केली जाणार आहे. अधिकार्‍यांच्या म्हणण्यानुसार, तपास पूर्ण झाल्यानंतरच आगीचे नेमके कारण स्पष्ट होईल.

मृतांमध्ये एकाच कुटुंबातील 5 जणांचा समावेश
या दुर्घटनेत मृत्यूमुखी पडलेल्यांमध्ये एका कुटुंबातील पाच जणांचा समावेश आहे. दुसर्‍या मजल्यावरील मागील घरातून अरविंद जैन, त्यांची पत्नी अनिता जैन, मुलगा निशांत जैन, सून आंचल जैन आणि दीड वर्षांचा नातू आकाश जैन यांचे मृतदेह आढळले. पहिल्या मजल्यावरून शिखा जैन यांचा मृतदेह सापडला. तसेच तिसर्‍या मजल्यावरून दुसर्‍या कुटुंबातील नितीन जैन, त्यांची पत्नी शैला जैन आणि मुलगा सम्यक जैन यांचे मृतदेह मिळाले. या दुर्घटनेत नवीन जैन हे गंभीर भाजले असून त्यांच्यावर रुग्णालयात उपचार सुरू आहेत.